Kolegji i Kryetarëve, Basha: Koha për Shtab Qendror Elektoral dhe Politik
Pas propozimit të opozitës për zgjidhjen e krizës përmes zgjedhjeve të njëkohshme parlamentare dhe lokale të parakohshme, me qeveri tranzitore që garanton standardet për zgjedhjet e lira dhe të ndershme, sot Kryetari i Partisë Demokratike, Lulzim Basha, në takim me Kryetarët e 61 Degëve të PD ka paralajmëruar ngrtjen e Shtabit Qendror Elektoral dhe Politik, shtabe që do të shtrihen në mënyrë piramidale në të gjithë vendin.
“Vendi është në një krizë të thellë shumëplanëshe dhe detyra e PD dhe e opozitës është të angazhohet seriozisht për të qenë pranë njerëzve dhe për t’i hapur rrugë perspektivës europine të Shqipërisë. Opozita ka dhënë propozimet e veta për zgjidhjen e krizës në vend, që kalon përmes zgjedhjeve të njëkohshme parlamentare dhe lokale të parakohshme, me qeveri tranzitore që garanton standardet për zgjedhjet e lira dhe të ndershme.”
Lulzim Basha ka sqaruar para Kolegjit të Kryetarëve arsyet e ngritjes së Shtabit Qendror elektoral dhe politik dhe mënyrën e veprimit.
“Pranë Partisë Demokratike do të ngrihet shtabi qendror elektoral dhe politik, shtabe që do të shtrihen në mënyrë piramidale në të gjithë vendin. Puna do të perqendrohet në planin e ofrimit të zgjidhjes për qytetarët, denoncimeve për aferat korruptive dhe kriminale të qeverisë, bashkimi i faktorëve dhe aktorëve me potencial njerëzor dhe eletoral pranë PD, si dhe hapja e partisë për njerëz me integritet profesional e moral.”
Me këtë rast, Kryetari i Partisë Demokratike, Lulzim Basha, u ka paraqitur Kryetareve të Degëve edhe një kalendar të qartë dhe konkret pune, ndërsa për aksionin politik u vendos që format të përcaktohen në një moment të dytë.
Ndërkohë sot Lulzim Basha ka takuar Ish-Kryetarin e PD-së, Eduard Selami. Mësohet se qëllimi i takimit kokë më kokë ishte bashkimi i kontributeve për Partinë Demokratike dhe opozitën.
