Kolegji i Kryetarëve/ Vendimi, Basha: Çdo të enjte protesta para Parlamentit kriminal deri…

Kryetari i Partisë Demokratike, Lulzim, Basha, duke bërë publike vendimet e Kolegjit të Kryetarëve të PD, tha se më 28 shkurt dhe me datën 7 mars, do të organizohen protesta kombëtare para asamblesë kriminale që ka uzurpuar godinën e Kuvendit të Shqipërisë:

“Dhe me datën 16 mars, javën pasardhëse do të zhvillohet një protestë e madhe kombëtare, me qëllim rrëzimin e uzurpuesit të qeverisjes së Shqipërisë, Edi Ramës, protesta të cilat do të kenë si qëllim, maksimalizimin e pjesêmarrjes qytetare, bashkimit qytetar dhe zëmërimit qytetar për reagimin e papërgjegjshëm të klikës kriminale që është kapur duke vjedhur votat e shqiptarëve.”

Hapi që Opozita ka hedhur të enjten e kaluar, tha Lulzim Basha, nuk është pa kthim vetëm për opozitën, por është pa kthim edhe për Edi Ramën, dhe plani që ka vënë në lëvizje prej muajsh, siç zbuluan dhe gazetarët investigativë italianë, për kapjen e zgjedhjeve të ardhshme, nuk do të realizohet. 

“Largimi i Edi Ramës është sot misioni më i madh kombëtar që ka çdo shqiptar që do familjen e vet dhe fëmijët e tij. Ne nuk do t’i lëmë as zgjedhjet e ardhshme, as fatin e shqiptarëve në dorë të narkomafias që po gatitet të blejë zgjedhjet e ardhshme, sepse zgjedhje të ardhshme me narkomafian apo me Maduron e Ballkanit, nuk do të ketë,” tha lideri i Opozitës kjo është dhe arsyeja që Partia Demokratike, opozita e bashkuar dhe gjithë qytetarët, do të marrin të gjitha masat:

“Protestë pas proteste, pa asnjë pengesë dhe frenim të zemërimit popullor, deri sa ta shporrim këtë bandit dhe hajdut nga karriget që ka vjedhur me krimin dhe paratë e krimit, por që ka harruar se pushteti i takon dhe do t’i kthehet pronarit të vërtetë, sovranit që, në republikën e Shqipërisë është populli.”

Me këtë rast, kryetari i PD sqaroi se pushteti do t’i kthehet popullit përmes zgjedhjeve të lira e të ndershme, mekanizmit që Edi Rama e ka frikë, mekanizmi që e tmerron dhe që e ka asgjësuar bashkë me Niçet, me Shullazët, me Habilajt, me Dakot, me Sejdinët me shokë.

“Pra, sezoni i protestave sapo ka nisur dhe nuk do të ketë të ndalur. Asgjë nuk do ta frenojë energjinë popullore për largimin e të keqes dhe për t’i dhënë Shqipërisë të nesërmen që meriton,” paralajmëroi Kryetari i Partisë Demokratike, Lulzim Basha, duke siguruar se kjo e nesërme do të jetë pa Edi Ramën, pa kriminelët, pa narkotrafikantët, pa hajdutët oligarkë, ndërsa përfundoi:

“Kjo e nesërme do t’u takojë të gjithë qytetarëve të thjeshtë e të ndershëm të këtij vendi dhe gazetarëve të ndershëm që nuk duhet të dridhen as nga i ftohti as nga frika, por duhet të dridhen ata që kanë bërë pazare të zeza me Edi Ramën, në kurriz të shqiptarëve.”