Kolegji Zgjedhor rrëzon vendimin e KAS, lista e PD me 153 kandidatë

Kolegji Zgjedhor ka pranuar padinë e Partisë Socialiste kundër listave të Partisë Demokratike-Aleanca për Ndryshim në zgjedhjet e 25 prillit duke bërë vendimin e KAS.

Përfaqësuesi i PD, Ivi Kaso, para Kolegjit Zgjedhor u shpreh se Koalicioni i PD paraqiti listat referuar legjislacionit.  

“Kemi respektuar të gjitha aspektet proceduriale. Paraqitëm listë me 222 kandidatura, në përputhje me numrin minimal të parashikuar në ligj, si edhe të plotpjesëtueshëm me tre. Numrin e kandidaturave të paraqitura prej nesh nuk e shohim si problematike për fletën e votimit. Limiti i sipërm i kandidaturave është çështje vetëpërmbajtjeje dhe vetëpërgjegjshmërie,”tha Ivi Kaso.

Ndërsa përfaqësuesi ligjor i Partisë Socialiste në KQZ, Eridian Salianji, u shpreh se kandidimi me shumë kandidatë ngarkon fletën e votimit dhe vështirëson kalimin e herësit nga ata që janë në pjesën e poshtme të listës.

“Koalicioni i PD ka sjellë 222 emra.  KQZ i pranoi 153 emra, me vendim të Komisionerit Celibashi. KAS pranoi kërkesën e PD për të regjistruar të gjithë kandidatët. Ne e kundërshtojmë. Palët nuk kanë mundësi të barabartë. Kjo sjell probleme me fletën e votimit por edhe me votën parapëlqyese. Fleta e votimit do të ngarkohet dhe do të bëhet e vështirë të kalohet herësi nga ata që janë në pjesën e poshtme të listës. PD e ka taktikë elektorale të mos thyet renditja nga asnjë, tha Eridian Salianji.

Kështu, pas vendimit të Kolegjit Zgjedhor, Partia Demokratike duhet do ta reduktojë në 153, listën me 222 kandidatë qëkishte dorëzuarrr në KQZ. 

Ndryshe, Partia Socialiste paditi në Kolegjin Zgjedhor vendimin e KAS për lejimin e listës me 222 kandidatë për deputetë të Partisë Demokratike. Ankimimi erdhi pasi Komisioni i Ankimimeve dhe Sanksioneve mbështeti kërkesën e PD-së, e cila kundërshtonte vendimin e Komisionerit shtetëror të zgjedhjeve që reduktoi listën e kandidatëve për deputetë nga 222 sa kishte propozuar Partia Demokratike, në 153.