Kolegji Zgjedhor votoi: Joe Biden, President i ri i SHBA

Joe Biden, fitoi vota të mjaftueshme të Kolegjit Zgjedhor për t’u konfirmuar president i ri i SHBA.

Kjo u bë e ditur pasi shteti i Kalifornisë i dha atij 55 votat e tij zgjedhore, gjatë takimit që u mbajt në Sakramento.

Anëtarët e Kolegjit Zgjedhor të SHBA, raporton RFE, u mblodhën sot në të 50 shtetet dhe Distriktin e Kolumbisë për të zgjedhur zyrtarisht Bidenin president të ardhshëm të SHBA-së.

Bazuar në rezultatin e zgjedhjeve të nëntorit, Joe Biden mori 306 vota të Kolegjit Zgjedhor ndërsa presidenti aktual, Donald Trump, fitoi 232 vota.

Për t’u zgjedhur president i SHBA-së duhen së paku 270 vota të Kolegjit Zgjedhor.

Sipas sistemit amerikan, votuesit në fakt votojnë për “zgjedhësit”, të cilët pastaj votojnë zyrtarisht për kandidatët.

Rezultati i Kolegjit Zgjedhor tani do të dërgohet në Washington dhe, më 6 janar, do të paraqitet në një seancë të Kongresit, të cilën do ta kryesojë Zv/Presidenti Mike Pence.

Presidenti i ri i Shteteve të Bashkuara inaugurohet më 20 janar.

Zgjedhjet në SHBA mbahen çdo katër vjet në të martën e parë të nëntorit dhe të drejtë vote ka secili shtetas amerikan mbi 18 vjeç.