Koloneli amerikan: Gjermania dhe Franca ishin për ndarjen e Kosovës

Para bombardimeve të Jugosllavisë, mundësia që veriu i Kosovës, ku jetojnë shumica e serbëve, t’i bashkohet Serbisë u mor parasysh dhe ideja u miratua nga Gjermania dhe Franca, por Shtetet e Bashkuara refuzuan një plan të tillë. Kështu u shpreh Koloneli amerikan, Douglas McGregor tashmë në pension duke zbuluar planet për ndarjen e veriut të Mitrovicës gjatë konferencës së Rambujes.

“Kur shikoni se çfarë po ndodh në Kosovë nga dita e parë e deri më sot, gjithçka ishte e parashikueshme. Para fillimit të bombardimeve, përfaqësuesit serbë dhe shqiptarë në Rambuje pranuan veçmas të merrnin pjesë në bisedime. Dhe kjo pjesëmarrje do t’u jepte serbëve një pjesë të Mitrovicës e cila gjendej buzë Serbisë. Ajo pjesë do të bëhej pjesë e përhershme e Serbisë dhe shumica e serbëve do të jetonin,” thekson Koloneli McGregor në një intervistë për një radio në Çikago duke shtuar:

“Në atë kohë, si francezët ashtu edhe gjermanët menduan se ishte një zgjidhje e mirë. Gjermanët donin të investonin qindra miliona marka në atë kohë për të financuar shtëpi dhe vendbanime të reja, për të rindërtuar qytete për serbët dhe shqiptarët. Evropianët e kuptuan, të paktën prapa dyerve të mbyllura, se këto ishin gjëra që ishin bërë qindra vjet më parë në Evropë, por pastaj përsëri, ne amerikanët u përfshimë në këtë çështje dhe e kundërshtuam atë.

Ne deklaruam se ky është fillimi i një Evrope të re, ku të gjithë do të detyrohen të jetojnë me dikë me të cilin nuk duan të jetojnë. Ne krijuam diçka që është një zgjidhje e paqëndrueshme dhe i detyruam serbët të jetojnë nën regjimin shqiptar, gjë që ata nuk e donin. Ndoshta, tani ne shohim një konflikt ushtarak, pasi ushtria serbe me siguri nuk do të presë me krahë të palosur dhe nuk do të lejojë që paraushtarakët e Kosovës të ngacmojnë serbët,” tha Koloneli amerikan.

Gjenerali gjerman qau kur filluan bombardimet e Serbisë

“Më kujtohet nata kur filloi fushata e bombardimeve, ne ishim në seli dhe gjenerali gjerman me katër yje filloi të rrokulliste lotët në faqe, ai më shikoi dhe më tha, Douglas, kjo është diçka që nuk duhet ta bëjmë. Pastaj u kthye dhe doli nga dhoma,” rrëfeu këto momente Koloneli amerikan, Douglas McGregor, duke saktësuar se oficerët britanikë dhe francezë mendonin të njëjtën gjë se ajo që ne po bënim ishte e çmendur, por politikanët në Perëndim e donin atë./RTK/