Komandanti i serbëve të BeH dënohet 20 vjet burg, 25-vjeçarit i prenë kokën me sopatë

Gjykata në BeH sot ka dënuar me 20 vjet burg Ish-Komandantin serbë, Rade Gariç pasi e shpalli fajtor për krime lufte të kryera në Bosnjen lindore, duke përfshirë edhe ato në Srebrenicë në korrikun e vitit 1995.

Gariç është akuzuar për vrasje, arrestim, keqtrajtim dhe zhdukje në Vlasenicë në vitin 1992 dhe Srebrenicë tre vjet më vonë kur dhe u bë gjenocidi ndaj boshnjakëve. 

Rade Gariç është shpallur fajtor i drejtëpërdrejtë për zhdukjen e 12 boshnjakëve nga kampi i Vlasenicës “Shushicë”, në kohën kur ai ishte pjesëtar i rojeve të policisë së serbëve të Bosnjes. Më vonë u bë pjesë e njësiteve ushtarake, përkatësisht komandant i ashtuquajturit tog të ndërhyrjes pranë brigadës së Vlasenicës. Pjesëtarët e njësitit të Gariçit, si dhe ai vetë personalisht, morën pjesë në keqtrajtimin e grupit prej 20 të arrestuarëve në vitin 1995 që më pas janë ekzekutuar.

Ndër krimet më të rënda, për të cilat Gariç është dënuar, është vrasja makabre e të riut Bego Smajloviçit i cili ishte 25 vjeç. Pas keqtrajtimit të tmerrshëm, me urdhër të Gariçit ai është vrarë duke i prerë kokën me sopatë.

“Trajtimi i tillë i njerëzve të gjallë, rrallë është shënuar në çështjet e krimeve të luftës,” tha gjyqtarja Jasmina Çosiç Dedoviç duke arsyetuar dënimin me faktin se Gariç është shpallur fajtor edhe për disa vrasje të ngjashme që trupi gjykues i ka vlerësuar ekstremisht brutale dhe të paskrupullta.