Kominterni dështoi!
nga Agim Popoci
Ra Qeveria e Albin Kurtit! Duke e arsyetuar veprimin e tij kriminal kur edhe Instituti i Shëndetit Publik rekomandonte që për shkak të situatës së krijuar nga koronavirusi të mos zhvillohet seanca parlamentare, vendosmërinë për zhvillimin e kësaj seance dhe përfundimin e saj, makineria propagandistike e Isa Mustafës u mundua ta shes si një fitore kundër “marksist-leninistit Albin Kurti”. Ky gatim mori dhen, dhe falë analfabetëve funksional të historisë, politikës dhe atyre që pa teklif e quajnë veten analist, këtij shkarkimi të Qeverisë Kurti i dhanë konotacion ideologjik!
A ishte shkarkim me baza ideologjike dhe kush e shkarkoi “marksist-leninistin Albin Kurti”!
Albin Kurti gjatë një interviste para se të fitonte zgjedhjet e 6 Tetorit, përkundër deklaratave të tij që shkaktuan reagime si për luftën nacional-çlirimtare, Fadil Hoxhën e Shaban Polluzhën, tha prerë se është socialdemokrat. Artikulimi i tij politik edhe përkonte me këtë ideologji por kur u bë Kryeministër i Kosovës, për të qenë i efektshëm luftimi i krimit dhe korrupsionit si realizim i një premtimi elektoral, nuk përkonte me asnjë ideologji dhe rend demokratik, madje as me monarki. Por u pa se Albin Kurti ishte i vendosur në këtë pikë!
Sapo filloi zbërthimi i kësaj bote kriminale, u harbua krimi që ishte futur në çdo qelizë të shtetit të Kosovës, ku po gllabëronte miliona euro. Pandemia mund të ishte sebepi, por Babai i kësaj bote kriminale, Hashim Thaçi, mendoi ta ndalonte këtë zbërthim përmes shpalljes së gjendjes së jashtëzakonshme dhe ngrirjes së kompetencave të një Kryeministri që ishte larg koniukturave të krijuara nga paslufta në Kosovë.
U fut në lojë edhe dialogu Kosovë-Serbi ndonëse nuk është sot kryefjala e asaj çfarë po ndodhë në situatën e krijuar nga koronavirusi, për ta ngritur kurbën e tensionit me taksën serbe. Oferta e Albin Kurtit në këtë situatë u përshëndetë nga Brukseli por jo dhe Washingtoni, dhe këtë thyerje të fuqive të mëdha, siç e shfrytëzoi Lenini pas luftës së parë botërore, më 4 Mars 1919 në Moskë, në Kosovë e shfrytëzoi Hashim Thaçi!
Lenini mblodhi bolshevikët nga e gjithë bota në Kongresin e parë të komunistëve dhe themeloi Internacionalen e tretë Komuniste, Kominternin, ashtu siç bëri Thaçi duke mbledhur homologun e tij enverist nga LPK, Ramush Haradinajn dhe titistin Isa Mustafa nga LKJ. Ajo që dallon në këtë rast Albin Kurtin nga kjo treshe e rrezikshme si për kombin ashtu dhe Kosovën është se, si në rastin me të mirë socialdemokrat ashtu edhe atë të akuzuar marksist-leninist, Albini nuk është betuar!
Ndërkohë Isa Mustafa i pari, i betuar para fotos së Zotit të Partisë Komuniste të Jugosllavisë, Josip Broz Tito, është betuar dhe ka marrë teserën duke dëshmuar deri më sot besnikërinë ndaj kësaj partie kriminale.
Po kështu, Hashim Thaçi dhe Ramush Haradinaj janë betuar me grusht në kokë para fotos së Zotit të Lidhjes Popullore të Kosovës, Enver Hoxha, dhe ky betim nuk ishte vetëm ceremonial sepse u dëshmua edhe në luftë se respektohej edhe me çmimin e jetës!
Forcat e Antantës ndërhynë pasi bolshevikët erdhën në pushtet në Rusi për të kthyer situatën që ishte. Kjo ndodhi edhe me Qeverinë Haradinaj ku asgjë nuk po funksiononte ndonëse ishte koalicion bolshevikësh që ishte krijuar me idenë e vendosjes së qetësisë me krahun e luftës në pushtet.
Fal Zotit, në Kosovë nuk ndodhi një luftë qytetare, por zgjedhjet e reja më 6 Tetor treguan se populli nuk i do në pushtet ata që në emër të çlirimit abuzojnë me pushtetin; Ndonëse kjo ndodhi edhe për shkak të një vale të re të rinjsh që i dolën para politikës keqbërëse edhe pse nuk i ishin betuar as Enverit dhe as Titos, dhe nuk kishin frikë as nga NKVD-ja e çlirimtarëve që futi në vrimë të miut gati të gjithë rugovistët, kur edhe sot nuk dihet se sa vrau duke i akuzuar si pjesë e atij grupi që krimineli serb Sllobodan Millosheviç i quante “shqiptarë të ndershëm”.
Qeveria e Albin Kurtit në pak ditë tregoi se sa shumë është vjedhur në këtë vend, se vjedhja ishte e centralizuar dhe se ekonomia ishte për toke nga dëmet që kishin bërë paraardhësit e tij. Kjo alarmoi paraardhësit e tij sepse thika e Albin Kurtit po i afrohej kockës, u përdor shpata e Grenellit që po i rrinte mbi kokë Albinit me taksën serbe, dhe çuditërisht nuk u përfill as situata nëpër të cilën po kalon bota me koronavirusin.
Hashim Thaçi mblodhi liderët bolshevik të parlamentit, Isa Mustafën dhe Ramush Haradinajn dhe e bëri të qartë se si mund të rrëzohet Albin Kurti. Isa Mustafa me përvojë nga viti 1989, mori përsipër të bindë shqiptarët e ndershëm në Parlamentin e Kosovës për ta rrëzuar njeriun që po kërcënonte të ardhmen e kësaj treshe të rrezikshme bolshevike, pasuria e të cilëve mund të krahasohet me buxhetet e shumë shteteve në botë.
Kështu dhe ndodhi, por këtij Kominterni kosovar i ndodhi një e papritur ndonëse e quanin aleatë, Institutin e Shëndetit Publik mbi të cilin, edhe pse Kryeministër, Abin Kurti nuk kishte fare pushtet. Ky Institut vlerësoi në këtë kohë koronavirusi, se 120 deputetë në një sallë, ku nuk kanë distancë sociale, janë rrezik për përhapjen e infeksionit. Kominterni nuk deshi t’ia dinte as për koronavirus dhe kërcënim të popullatës nga vinin këta deputetë, as për trockist e fraksionist sepse e kish ndarë mendjen që qeveria e Albin Kurtit duhet të shkarkohet.
Seanca ishte një spektakël idiotësh që ishin shumë larg nivelit të deputetëve që bën nul Konferencën e Bujanit më 1946 dhe refuzuan bashkimin me Shqipërinë, ose ata të vitit 1989 kur Isa Mustafa i vuri në rresht dhe votuan kundër Kushtetutës së vitit 1974 që Kosovën e njihte njësi kushtetuese të Jugosllavisë, sepse sipas Millosheviçit, Kosova ishte “shtet në shtet”, dhe duhej të kthehej nën Serbi. Larg, sepse si në vitin 1946 ashtu dhe 1989 ata e kishin të qartë se po votonin për Serbinë, ndërsa mbrëmjen e së mërkurës, deputetët e LDK, PDK dhe AAK po votonin për Hashim Thaçin, Isa Mustafën dhe Ramush Haradinajn, të cilët me rrëzimin e Qeverisë Kurti po i hapnin dyert Serbisë që të kthehen në tryezën e dialogut për të vazhduar me shefin e Kominternit të Kosovës, shkëmbimin e territoreve në emër të zgjidhjes së problemit!
Dhe, gjithë kjo shfaqje e shëmtuar, përkundër planit të detajuar të Kominternit të Kosovës dështoi dhe ndonëse i shkarkuar, më i fituari doli Albin Kurti!
Në mungesë të përvojës politike të Kadri Veselit për ta përdor këtë mocion të Kominternit si burrë shteti, duke e refuzuar lojën e Isa Mustafës, ai e la në rënie të lirë zhvillimin e planit të treshes, plan nga i cili nuk përfitoi dhe si i tillë vetëm LDK-në e dëmtoi.
Sot, Albin Kurti i shkarkuar nga Kominterni i Kosovës, edhe me taksë serbe dhe pa Agim Veliun ka përpara vetes shumë detyrime rreth luftës dhe parandalimit të përhapjes së koronavirusit, që dëshmon edhe një herë pse kjo seancë nuk duhej zhvilluar fare.
Sot, Albin Kurti mund të vazhdoj të ketë mbështetje nga Brukseli dhe qortim nga Washingtoni, por të dyja palët duhet ta kenë të qartë se ky popull do të vazhdoj të jetë proamerikan pavarësisht shijeve të liderëve politik dhe nuk kanë arsye ti joshin ata. Këtu gaboj Ambasadori Grenell dhe ekipi i tij! Pavarësisht bindjes ideologjike të Albin Kurtit dhe dashurisë së Isa Mustafës me shokë për Beogradin, ata janë të detyruar ta respektojnë vullnetin e SHBA për shkak të elektoratit!
Dhe në fund, sot është e qartë se Kominterni dështoi në rrënimin e “marksist-leninistit Albin Kurti”. Pas seancës së turpshme të 25 Marsit, qytetarët e Kosovës u qartësuan se kujt nuk duhet ti japin më votën ndërsa Albin Kurti dhe Lëvizja Vetëvendosje bëjnë gjumë të qetë sepse pavarësisht se kur do të zhvillohen zgjedhjet, fitoren e kanë të sigurt. Mrekulli edhe mund të mos bëjë Albin Kurti dhe nuk ka arsye të premtoj, ama Kosova do të ketë para aq sa punon dhe jo aq sa nuk vidhet!
