Komisioni Antikorrupsion i Edi Ramës bojkotohet nga opozita, ai vazhdon luftën kundër vetvetes
Pasi arriti kulmin me qeverinë më të korruptuar që nga krijimi i shtetit shqiptar 1912, Kryeministri Edi Rama ideoi Komisionin Antikorrupsion, përcaktoi dhe përfaqësuesit e opozitës që do të marrin pjesë duke shpërfillur partitë opozitare, dhe, sot, në ditën e konstituimit të këtij Komisioni, kur opozita e bojkoton pavarësisht parashikimit të Kryetarit të Partisë Demokratike Jozyrtare, Lulzim Basha, Ministrja e Shtetit për Marrëdhëniet me Parlamentin e Shqipërisë, Elisa Spiropali, thotë se në BE nuk integrohet qeveria, por shteti shqiptar.
“Në BE nuk integrohet qeveria, por shteti shqiptar. Dora jonë për deputetët e opozitës, mbetet e shtrirë. Debatet politike mbahen mend përkohësisht. Dialogu konstruktiv me aktorë të tjerë shoqërorë në vend përbën një qasje të re dhe të nevojshme për një cilën të ri reformimi të rolit të Kuvendit,” tha Elisa Spiropali duke konfirmuar se nuk i duhet opozita por deputetët e opozitës që ka caktuar Skënderbeu i saj: Jorida Tabaku, Dhurata Tyli Çupi, Sorina Koti, Flutura Açka dhe një vend bosh për Nënkryetarin e Komisionit.
Pra, Qeveria e çon Korrupsionin në stratosferë, Qeveria thotë se e bëri SPAK-un për ta luftuar këtë korrupsion, Qeveria propozon dhe miraton vetë Komisionin Antikorrupsion, Qeveria përcakton vetë anëtarët e opozitës në kët Komision, dhe në ditën që i duhet opozita sepse BE dhe SHBA i bëjnë të qartë se në Komision duhet të përfshihet opozita, Edi Rama shtyp butonin dhe mamica e tij thotë se në BE nuk integrohet qeveria, por shteti shqiptar!
Ndërsa kryetari i këtij Komisioni, Fatmir Xhafa, duke bërë të paditurin shprehu keqardhje që opozita nuk i është përgjigjur ftesës për bashkëpunim
“I keqardhur që opozita nuk i është përgjigjur kësaj ftese për bashkëpunim, këtij detyrimi të përbashkët për angazhim në këtë Komision që buron nga kushtetuta dhe rregullorja e kuvendit.
Ky Komision do adresojë çështje me rëndësi jetike për të ardhmen e vendit, përtej interesit të partive tona, i shërben forcimit dhe modernizmit të shtetit, të ardhmes së vendit tonë,” tha Fatmir Xhafa.
Ndryshe, deri sa Fatmir Xhafa shpreh keqardhje tashmë është e qartë se pas vendimit të fundit të Gjykatës së Apelit, do të jetë Kryetari i PD, Sali Berisha, ai që do të vendos nëse opozita do të marrë pjesë në këtë Komision, kush do të jenë anëtarët dhe Nënkryetari i saj, dhe jo ti përcaktoj Edi Rama siç bëri për 11 vjet!
Ky është realiteti i ri i cili, gjithsesi, nuk cenon talljen e Edi Ramës me Partinë Socialistët dhe ndryshimin e anëtarëve socialistë në këtë Komision: Klotida Bushka, Eduard Shalsi, Etilda Gjonaj, Evis Kushi dhe Toni Gogu.
