Komisioni Evropian mbështet rifillimin e dialogut Kosovë-Serbi
Presidentja e Komisionit Evropian, KE, Ursula von der Leyen, ka shprehur mbështetje për rifillimin e dialogut Kosovë-Serbi, i cili, siç tha, është thelbësor për përparimin e këtyre vendeve drejt BE-së.
Ajo këto komente i ka bërë gjatë një takimi me presidentin e Serbisë, Aleksandar Vuçiç, në Bruksel, raporton RFE duke shtuar se palët u pajtuan për rëndësinë e përparimit të Serbisë në reformat e nevojshme për anëtarësimin në BE, veçanërisht në fushën e sundimit të ligjit dhe luftën kundër korrupsionit.
Me këtë rast presidentja e KE-së ka inkurajuar udhëheqjen serbe, që pas zgjedhjeve parlamentare në Serbi, të zhvillojë një dialog të mirëfilltë me të gjitha forcat politike, me qëllim të inicimit të reformave, të cilat kërkojnë një konsensus të gjerë.
“Para kësaj, ne jemi në pritje të një samiti, në të cilin do të marrin pjesë përfaqësues të vendeve më të mëdha evropiane, i cili do të ketë të bëjë me vazhdimin e dialogut, por edhe përshpejtimin e mëtutjeshëm të rrugës së Serbisë në BE,”tha Vuçiç pas takimit duke paralajmëruar vazhdimin e dialogut midis Beogradit dhe Prishtinës.
Përfaqësuesi i Posaçëm i BE-së për dialogun midis Prishtinës dhe Beogradit, Mirosllav Lajçak, ishte gjithashtu i pranishëm në këtë takim.
Një ditë më parë, kryeministri i Kosovës, Avdullah Hoti, ishte po ashtu në Bruksel, ku pas takimit me Hotin, presidenti i Këshillit Evropian, Charles Michel, tha se është e nevojshme të vazhdohet dialogu mes Kosovës dhe Serbisë për normalizimin e marrëdhënieve.
“Gjatë takimit tonë, theksova nevojën urgjente për përparim në dialogun Beograd-Prishtinë. Emërimi i fundit i ambasadorit, Mirosllav Lajçak si Përfaqësues i Posaçëm i BE-së për dialogun Beograd-Prishtinë, ilustron fokusin e BE-së në këtë dialog, vazhdimi i të cilit është paraparë të ndodhë në muajin korrik në Bruksel,” tha Michel pas takimit.
Ndryshe, dialogu është ndërprerë në fund të vitit 2018, për shkak të një takse që u ka vënë Qeveria e atëhereshme e Kosovës prodhimeve të importuara nga Serbia. Barrierat tregtare me Serbinë tani janë hequr.
Presidenti i Kosovës, Hashim Thaçi, po ashtu ka paralajmëruar mbajtjen e një samiti në Francë, në mes të Kosovës dhe Serbisë, në javën e tretë të korrikut.
