Komisioni Hetimor për shkarkimin e Metës, Manja: 3 muaj hetim!
Komisioni Hetimor për shkarkimin e Presidentit Ilir Meta është mbledhur sot në mbledhjen e parë, për të shqyrtuar kërkesën e deputetëve socialistë.
Në mbledhjen e parë, Kryetari i Komisionit, Ulsi Manja, deklaroi se për një periudhë 3-mujore do të bëhet një hetim i plotë mbi vendimin e Metës, i cili më pas do t’i dorëzohet Kuvendit për veprime të mëtejshme.
“Në optikën e kolegëve deputetë që kanë kërkuar shkarkimin e tij konstatohet se sjellja e tij në lidhje me procedurat e ndjekura, presidenti ka shkelur rëndë kushtetutën dhe kjo sipas tyre përbën shkak ligjor për pezullimin nga detyra. Ky komision referuar saktësisht vendimit 84, për një periudhë 3 mujore do bëjë një hetim të plotë për t’i paraqitur Kuvendit një raport përfundimtar. Ky është edhe deklarimi i komisionit hetimor i përcaktuar në vendimin dhe komisioni është i detyruar t’i rrijë strikt,” tha Ulsi Manja dhe për këtë qëllim u caktuan bashkërelatorët Halit Valteri dhe Alket Hyseni të cilët do të përgatisin planin paraprak të hetimit.
Ndryshe, socialistët e Edi Ramës kërkojnë shkarkimin e Presidentit Ilir Meta me argumentin se ka shkelur rëndë Kushtetutën, me Dekretin për anulimin e zgjedhjeve të 30 Qershorit, duke dekretuar 13 tetorin si datë për zhvillimin e këtyre zgjedhjeve.
