Komisioni i Ligjeve, konstituohet Grupi i Dialogut mes mazhorancës e opozitës
Sot në Komisionin për çështje ligjore, administratën publike dhe të drejtat e njeriut u konstitua Grupi i Dialogut mes mazhorancës dhe opozitës për ligjet që kërkojnë shumicë të cilësuar votash si dhe ligjet e nevojshme për procesin e anëtarësimit në Bashkimin Evropian.
Ashtu siç ishin dakordësuar, ky Grup i Dialogut do të ketë 3 anëtarë nga opozita dhe 3 nga mazhoranca ndërkohë Lulzim Basha për herë të parë i qëndroi fjal së dalë nga goja e tij e shitur dhe refuzoi vendin në këtë Grup i cili u zëvendësua nga Partia e Lirisë.
Kështu, pjesë e Grupit nga Partia Socialiste anëtar janë: Damian Gjiknuri, Klotilda Bushka dhe Toni Gogu.
Ndërsa nga opozita anëtarë të jenë Oerd Bylykbashi, Dhurata Çupi dhe Erisa Xhixho.
Pas mbledhjes me dyer të mbyllura e cila zgjati rreth 1 orë, anëtari i Partisë Demokratike, Oerd Bylykbashi tha se Reforma Zgjedhore është prioriteti i tyre ndërsa anëtari i Partisë Socialiste, Damian Gjiknuri, tha se do adresohen rekomandimet e ODHIR dhe vendimet e Gjykatës Kushtetuese.
“Komisioni për Reformën Zgjedhore mbaroi afatin dhe nuk arriti gjë. Dikush mund ta quajë edhe dështim,” tha Gjiknuri ndërsa për amnistinë penale do vijojnë diskutimet.
“Opozita e ka mbështetur gjithmonë amnistinë. Do shohim kush janë zgjidhjet konkrete që opozita të arrijë objektivat e saj. Amnistia duhet të marrë votat e nevojshme, ka një dialog mes grupeve parlamentare.”
Ndryshe, pavarësisht tensioneve, Grupi i Dialogut i themeluar me dakordësinë e opozitës dhe mazhorancës pritet të marrë vendime me konsensus për ligjet që duan 84 vota, përfshirë Reformën Zgjedhore dhe vakanca ligjore që do konstatohet nga procesi i negociatave me BE-në.
