Komisioni i Ligjeve rrëzon Dekretin e Metës, të enjten rivotimi i Kodit Zgjedhor në Parlament
Ashtu siç kishte paralajmëruar Kryeministri Edi Rama, me 15 vota kundër, sot Komisioni i Ligjeve ka rrëzuar Dekretin e Presidentit të Republikës, Ilir Meta, për kthim në Parlament të ndryshimeve në Kodin Zgjedhor.
Pas më shumë se 2 orë debat, mazhoranca vazhdon të jetë e bindur se ndryshimet në Kodin Zgjedhor duhen miratuar në mënyrë që të fillojë puna për përgatitjen e zgjedhjeve të 25 prillit të 2021.
Llumi opozitar edhe me këtë rast nuk ishte në një zë lidhur me Dekretin e Presidentit.
Presidenca përfaqësohej nga Këshilltari i Metës, Bledar Dervishaj, i cili kërkoi pranimin e Dekretit për kthim si pritjen e opinionin të Komisionit të Venecias.
”Do dëshiroja të komentoja, dy qasje të dy deputetëve. Do respektoj qëndrimin tuaj. Presidenti siç e ka shprehur, në 21 tetor i është drejtuar Venecias me një kërkesë që tashmë Parlamenti e disponon me 8 pyetje. Janë ato pyetje siç një nga deputetët e tha për të bërë një lexim objektiv nga një aktor i paanshëm, ndërkombëtar, autor i kodit të praktikave të mira. Në mungesë të Gjykatës Kushtetuese, Presidneti i është drejtuar autorit të këtyre praktikave për të marrë opinion,” tha Bledar Dervishaj duke shtuar se Presidenti vlerëson se pas kthimit në Parlament, mazhoranca duhet të reflektojë, duke siguruar njëkohësisht opinionin final të Venecias dhe duke thirrur dialog në Këshill Politik ndërsa përfundoj.
“Prandaj kërkojmë pranimin e dekretit dhe pritjen e Komisionit të Venecias. ”
Kodi Zgjedhor tashmë do ti nënshtrohet votimit në seancën plenare të enjtes, ku siç tha Kryeministri Edi Rama, refuzimi i Presidentit do të pranohet ose rrëzohet nga Parlamenti.
