Komisioni i Operacioneve Elektorale: Mbi 40 mijë anëtarë të PD në zgjedhje, s’kishte përçarje!

Mbi 40 mijë anëtarë kanë marrë pjesë në zgjedhje dhe nuk ka pasur rrjedhje apo përçarje. Ky është konkluzioni i Komisionit të Organizimit dhe Kontrollit të Operacioneve Elektorale i Partisë Demokratike i cili është i kënaqur me procesin zgjedhor ndërsa sqaroi se kur do të mbyllet dhe procesi në PD Dega 12 Tiranë dhe Malësi të Madhe.

“Nuk kemi rrjedhje, nuk ka përçarje. Kjo duhet përshëndetur. Falenderojmë ata që morën pjesë në një nga proceset më demokratike dhe transparente që ka ndodhur ndonjëherë në PD. Partia sot ka mbi 40 mijë anëtarë që kanë marrë pjesë në zgjedhje dhe nuk ka pasur rrjedhje apo përçarje. Kjo ka qenë ana më pozitive. Janë zhvilluar Kuvendet e degëve në thuajse të gjithë degët ku është zgjedhur kandidati. Aty janë caktuar delegatët. Numërimi ka qenë tejet transparent, interesi ka qenë i madh. Çdo gjë ka qenë e caktuar nga lart. Në të gjitha degët ka nisur procesi i votimit në orën 23:00 dhe ka mbaruar në 2-3 të mëngjesit. Po kështu edhe në degët e tjera. Sot mbyllet lista për në Kuvend dhe do të bëhet lista për Këshillin Kombëtar. Do të dalim në konferencë dhe do e themi,” tha Albana Vokshi ndërkohë sqaroi se përse në këto zgjedhje morën pjesë më pakë anëtarë – 39.512, se sa në Referendumin e 18 Dhjetorit, në të cilin u raportua se morën pjesë 43.879.

“Janë dy degë ende për të zhvilluar zgjedhjet dhe shifra në total do jetë mbi 40 mijë anëtarë, gjithashtu përmenda që ka pasur probleme, ka pasur fluks, në Referendumin e 18 Dhjetorit ka pasur disa qendra votimi, duke bërë që të jenë më të aksesueshme nga anëtarësia, ndërkohë që në për zgjedhjen e degëve, ka qenë vetëm një qendër votimi, gjë që ka bërë mbase të pamundur edhe ardhjen e votuesve. Ana tjetër, ka pasur shumë fluks që kanë qëndruar me orë pranë qendrës për të votuar dhe një pjesë e tyre janë larguar pa votuar, si dhe për shkak të listave që kanë pasur parregullsi ka pasur anëtarë që mund të mos e kenë gjetur emrin e tyre në listë.”