Komisioni i ri i Reformës Zgjedhore, PD: Nuk sjellim vëzhgues, ja arsyet…

Një ditë para mbledhjes së Komisionit të ri të Reformës Zgjedhore, drejtuar nga bashkëkryetarët Damian Gjiknuri dhe Rudina Hajdari, dhe duke ju përgjigjur ftesës zyrtare të Kuvendit, Partia Demokratike e bënë të qartë se refuzon të dërgojë përfaqësuesin e saj në rolin e vëzhguesit me arsyetimin se ky Komision nuk ka legjitimitet dhe se Refoma nuk mund të bëhet nga individë që duhet të ishin në burg për blerjen e zgjedhjeve.

Në përgjigje të kërkesës së Kuvendit, Sekretari i Përgjithshëm i PD, Gazment Bardhi shprehet:

“Asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare.”

Duke ritheksuar nevojën për Reformë të vërtetë Zgjedhore, PD shpreh bindjen se ajo duhet të realizohet e të zbatohet vetëm nga institucione apo parti që kanë vullnet për të garantuar zgjedhje të lira dhe të ndershme ndërsa përfundon:

“Personat, subjekt i hetimeve penale nr. 184/2016 apo nr. 339/1/2017 të Prokurorisë për Krimet e Rënda, janë në kushtet e konfliktit të interesit me zgjedhjet e lira dhe të ndershme, si dhe me Reformën e vërtetë Zgjedhore, për të cilën ka nevojë vendi.”