Komisioni i Venecias në Presidencë, Meta: Shqipëria nuk do të ishte në këtë situatë, nëse…

Presidenti i Republikës, Ilir Meta, pas takimit me delegacionin e Komisionit të Venecias në misionin fakt mbledhës për shkeljet e pretenduara të Presidentit të Republikës, thekson se sikur të ishin respektuar rekomandimet e tyre Shqipëria kurrë nuk do të ishte në këtë situatë.

“Kënaqësi të prisja sot një përfaqësi të #KomisionitTëVenecias. Nëse do ishin respektuar rekomandimet e tyre në të kaluarën, Shqipëria kurrë nuk do të ishte në këtë situatë,” thekson Ilir Meta përmes rrjetit social Twitter

Sot delegacioni i Komisionit të Venecias në misionin fakt mbledhës për shkeljet e pretenduara të Presidentit të Republikës, ditën e nisi me takimin e ish-deputetëve Oerd Bylykbashi dhe Klajda Gjosha, duke vazhduar me kreun e Grupit Parlamentar të PS, Taulant Balla dhe Kryetarin e Parlamentit, Gramoz Ruçi.

Delegacioni i Komisionit të Venecias kryesohet nga akademiku finlandez në fushën e jurisprudencës, Kaarlo Tuori. Anëtarë janë, avokatja e të drejtave të njeriut dhe juriste ndërkombëtare, Grainne Mcmarrow, kreu i divizionit për Çështjet Kushtetuese, Schnutz Rudolf DÜRR, si dhe Sekretari i Komisonit, Thomas Markert.