Komisioni për Çështje Europiane. PD: S’mund të kemi Shqipëri perëndimore pa demokraci e sundim të ligjit

“Nuk mund të kemi një Shqipëri perëndimore dhe një proces integrimi me në qendër qytetarët kur mungon demokracia, sundimi i ligjit, reformat në shtetin ligjor dhe mbrojtje politike ndaj anëtarëve të mazhorancës, ndërsa goditet politikisht opozita duke e sulmuar dhe eklipsuar padrejtësisht dhe pandershmërisht atë,” tha Kryetarja e Komisionit për Çështje Europiane dhe deputetja e PD, Jorida Tabaku, në fillim të seancës së sotme ku pritej të shqyrtohej Drafti i Pozicionit Negociues për Grupimin e parë të kapitujve “Themelorët”, për negociatat për anëtarësimin në BE, duke e prezantuar qëndrimin zyrtar të Partisë Demokratike për t’u larguar më pas nga punimet e mbledhjes së Komisionit.

“Si kryetare e Komisionit të Çështjeve Europiane dhe si përfaqësuese e opozitës më duhet të sqaroj se:
Partia Demokratike është e vetëdijshme që sot ndodhemi larg një vendi me kushte të plotësuara, por ne besojmë se ky është një proces për Shqipërinë e shqiptarët jo për politikën. Prandaj e mbështesim avancimin e Shqipërisë në procesin e integrimit dhe angazhimi jonë në këtë proces ka qenë i qartë. Partia Demokratike e ka nisur këtë proces e ajo do ta përfundojë atë pa rënë pre e provokimeve apo dhe insinuatave se ka një ndarje mes procesit të integrimit, Europës dhe Partisë Demokratike,” tha Jorida Tabaku duke konstatuar me keqardhje detyrimet e vendosura për një Shqipëri perëndimore dhe Europiane ende mbeten të paplotësuara.

– Fatkeqësisht, në “roadmap”-in e miratuar një javë e pak më parë, kemi parë mungesën e vullnetit politik për një reformë zgjedhore konform këshillave të OSBE-ODIHR. Ne propozojmë që kjo të ndodhë brenda vitit 2024, ndryshe sa propozon qeveria mbas zgjedhjeve të 2025.

– Balanca e pushteteve dhe respektimi i shtetit ligjor janë sot në rrezik Janë mbi 9 vendime të Gjykatës Kushtetuese që kanë faktuar përpjekjet antikushtetuese dhe antidemokratike, ku shpesh korrupsioni dhe shkeljet ligjore janë mbrojtur përmes forcës së shumicës parlamentare.

– Për herë të parë Shqipëria ka cënuar shkeljen e MSA me mos respektimin e nenit 79 të tij ku kalojnë ligje me porosi që cenojnë konkurrencën dhe procesi prokurues është ndër më korruptivët në vend.

– Korrupsioni sistemik ndikon në mënyrë shumë të thellë strukturat e qeverisjes, duke krijuar varësi të ngushta midis politikës, biznesit dhe grupeve të interesit.

– Për të siguruar një sistem drejtësie efikas dhe të drejtë, është e nevojshme të adresojmë sfidat aktuale. Qytetarët përballen me pritje të gjata për vendime gjyqësore, me një mesatare prej 14.6 vitesh për çështjet civile dhe 10 vitesh për ato penale. Masa duhet të merren për të reduktuar stokun prej 139,000 dosjesh dhe për të përmirësuar efikasitetin e sistemit gjyqësor. Gjithashtu, duhet siguruar që prokuroria speciale dhe institucionet e tjera të drejtësisë të veprojnë në mënyrë të pavarur dhe transparente,” tha Kryetarja e Komisionit për Çështje Europiane, Jorida Tabaku, duke përshëndet Presidenten e Komisionit Europian, Komisionerin veçanërisht Parlamentin Europian e kryetare e Komisionit të çështjeve të Jashtme që kanë qëndruar atje në mbështetje jo të qeverisë, por të Shqipërisë e shqiptarëve.

Reagimi i mazhorancës ishte shumë më tronditës se sa situata në të cilën ndodhet Shqipëria, që u faktua në fjalën e Kryetares së Komisionit, Jorida Tabaku. Kreu i Grupit Parlamentar të Partisë Socialiste, Niko Peleshi, ishte i shqetësuar për nëpërkëmbjen e procedurave në Komision dhe jo për Shqipërinë ku mungon demokracia, sundimi i ligjit, reformat në shtetin ligjor, mbrojtje politike ndaj anëtarëve të mazhorancës dhe goditje politike ndaj opozitës siç evidentoi deputetja e PD, Jorida Tabaku.

“Nuk mund të ketë mbajtje peng të mikrofonit. Procedura që ju zgjodhët të hapnit mbledhjen e Komisionit është totalisht e nëpërkëmbur. Më vjen keq ta them por kjo nuk është qytetare,” tha Niko Peleshi duke kërkuar nga opozita që të mbështesë procesin e integrimit, veçanërisht në një moment historik si ai i hapjes së kapitullit të parë të negociatave me BE.

Ndërkohë deputeti i PD, Edi Paloka, njoftoi arsyet përse Partia Demokratike kishte ndërmarrë nismën e re të saj duke sqaruar se nuk janë kundër procesit të integrimit, por janë para një narkoshteti.

“Shqipëria e Edi Ramës nuk plotëson asnjë nga kushtet e BE-së. Për fat të keq nuk plotëson asnjë nga kriteret e BE aktualisht që flasim, kur pritet edhe hapja e negociatave. Reforma elektorale, kushtet e të cilës prej 11 vitesh nuk plotësohen dhe regjimi nuk lejon zgjedhjet e barabarta në Shqipëri, edhe pse i kërkon OSBE-ODIHR,” tha Edi Paloka duke folur dhe për persekutimin e opozitës në prag të zgjedhjeve:

“Kjo drejtësi është e kapur dhe në duart e Edi Ramës. Sot në prag të zgjedhjeve, të gjithë krerët e partive opozitare janë nën arrest, persekutim apo në çështje penale nga kjo drejtësi e reformuar. Fredi Beleri u arrestua dhe u burgos dhe u zgjodh eurodeputet duke qenë në burg. Një tjetër koleg i yni dy ditë më parë (Ervin Salianji), po si Fredi Beleri, pa dëshmitarë e prova u çua në burg”.

Pas përmbylljes së fjalës së deputetit të PD dhe Kryetarit të Këshillit Kombëtar të Partisë Demokratike, Jorida Tabaku dhe Edi Paloka u larguan nga mbledhja e Komisionit për Çështje Europiane.