Komisioni Reformës Zgjedhore, Gjiknuri: Të gjejmë pika kompromisi! Alibeaj: SHBA dhe BE, ndihmë!

Sot më në fund u konstitua dhe filloi punën Komisioni i Posaçëm Parlamentar për Reformën Zgjedhore. bashkëkryetari i Komisionit, deputeti i PS Damian Gjiknuri sugjeroi që debatet politike t’iu lihen partive politike teksa ka prezantuar dhe rendin e ditës ndërsa Bashkëkryetari i Komisionit, deputeti i PD, Enkelejd Alibeaj kërkoi 6 ekspertë që do të ndihmojnë Komisionin nga 4 sa ishin më parë.

“Duhet të gjejmë pika të përbashkëta kompromisi për rekomandimet e ODIHR. Ne nuk kemi mundur t’i adresojmë të gjitha rekomandimet e OSBE/ODIHR. Kemi disa rekomandime të reja që vijnë nga zgjedhjet e 2021. Palët mund të diskutojnë dhe për çështje të tjera që mund të dalin. Do bëjmë maksimumin për të gjetur konsensusin. Janë disa vendime për të marrë sot që unë i propozoj. Do kërkojmë ekspertizën e OSBE/ODIHR.

Në vendimin e Kuvendit është shkruar që ne do kërkojmë mbështetje dhe nga organizma të tjerë, ambasada e SHBA, E BE. Këshilli i Europës, të cilëve do iu drejtohem me një letër. Shpresojmë që këtë komision ta drejtojmë pa debate. Debatet politike tua lëmë parive politike. Ligji zgjedhor është një ligj që reflekton vullnete politike,” tha Gjiknuri duke deklaruar Rendin e Ditës:

“Kërkimin zyrtarisht të asistencës nga të gjithë organizmat, lejimin për t’iu drejtuar zyrtarisht organizmave, përcaktimin e numrit të ekspertëve dhe ekspertët do të na sjellin rekomandimet, një program pune.”

Ndërsa bashkëkryetari i Komisionit nga radhët e PD, Enkelejd Alibeaj, tha se të gjitha organizmat ndërkombëtare do të jenë të ftuara të marrin pjesë me ekspertizën e tyre në ndryshimet e Kodit Zgjedhor.

“Kam kërkuar që përveçse dërgimit të një kërkese zyrtare OSBE-së, do tia dërgojmë të njëjtën kërkesë edhe Këshillit të Europës, Komisionit të Venecias, përfaqëues të BE-së dhe SHBA-së që kanë të drejtën të sjellin përfaqësuesit e tyre dhe të marrin pjesë me ekspertizë. Edhe organizata vendase me traditë në ndjekjen e procedurave zgjedhore që kanë përvojë, janë të ftuar që të marrin pjesë në mbledhjet e komisionit të reformës zgjedhore,” tha Alibeaj duke kërkuar me këtë rast 6 ekspertë që do të ndihmojnë Komisionin.

“Sa i takon përcaktimit të numrit të ekspertëve, tradita ka qenë me 4 ekspertë, dy nga njëra anë, dy nga ana tjetër. Unë kërkoj të bëhen 6 ekspertë për të akomoduar edhe nevojat e ekspertizës teknike të përfaqësuesve të pjesës sonë, por edhe në funksion të një analize teknike të të gjitha nevojave që ky komision do të duhet të trajtojë.”

Anëtar i këtij Komisioni nga radhët e PD, Oerd Bylykbashi, kishte kritika si për Gjiknurin ashtu dhe Alibeajn ndërsa përbërja shumë e madhe e këtij Komisioni, sipas tij, mund të mos jetë efikas.

“Nëse ka një komision që ka rëndësi si komision i posaçëm është ky komision, ndoshta është nga ata pak komisione që merret me pjesën më reale të politikës. Nëse numërohet pavarësisht si votohet, ky komision është kot. Në 2002 është vendosur të bëhet me consensus ndryshimi i kodit zgjedhor. Në 2013 rrotacioni ishte i qetë. Pas 10 vjetësh nuk kemi arritur ta bëjmë këtë. Për fat të keq edhe detyra e Këshillit Politik arriti një marrëveshje, edhe një tekst Kodi Zgjedhor për të votuar me konsensus. Por para nesh tani kemi ndryshimet e 5 tetorit që u miratua në mënyrë të njëanshme. Ajo që arrihet në dakordësi për politikën reale, ajo qëndron. Ndryshe ne tallemi me opinionin publik dhe votuesit,” tha Oerd Bylykbashi duke konstatuar se ky Komision nuk ka ndryshim nga ata paraprak, made e konsideron si fotokopje:

“Ky është nga komisionet e rrallë kaq i madh. Ky komision ka nevojë të jetë efikas. Rënia dakord që këtu të jenë përfaqëues grupesh parlamentare është i gabuar, duhet të ishin të gjitha partitë politike, të mëdha dhe të vogla. Për fat të keq në gjykimin tim, unë e shoh këtë komision si fotokopje, pa marrë parasysh realitetin.”

“Kemi vënë si objekt të punës rekomandimet e OSBE-ODIHR, por dëgjova këtu që ky komision nuk është politik, por është teknik. Kjo është një nga reformat më politike që bën ky Parlament. Nëse këtu shkon teknikisht gabim, ditën e zgjedhjeve është politik. I gjithë komuniteti ndërkombëtar duhet të rikthejë vëmendjen te rekomandimet e OSBE-ODIHR. Flitet për shitblerjen e votës, flitet për abuzim masiv të shtetit për të fituar zgjedhjet. Uroj që edhe faktorët e tjerë të komunitetit ndërkombëtar,” tha anëtari i Komisionit, Oerd Bylykbashi, duke përfunduar:

“Kjo reformë zgjedhore nuk mund të jetë pazar. Nuk mund të jetë si fundi i 2020, ku një pazar jo thjesht ndryshoi kodin zgjedhor, por shkatërroi një system zgjedhor. Rregullat e lojës në parim nuk ndërrohen në mënyrë të njëanshme. Ne sot duhet të punojmë bashkë për të vënë rregulla loje për qindra mijëra zgjedhës që janë atje. Përndryshe reformat bëhen për të zgjidhur probleme. Nëse krijon krizë politike, është më mirë të mos nisë.”

Ndryshe, diskutimet rreth Reformës Zgjedhor kanë filluar vjeshtën e kaluar ku PD në atë kohë kërkonte rishikim e sistemit zgjedhor ndërsa PS reformë zgjedhore bazuar në rekomandimet e OSBE/ODIHR.

Kjo është përbërja e Komisionit për Reformën Zgjedhore:

1. Damian Gjiknuri bashkëkryetar (PS)
2. Enkelejd Alibeaj bashkëkryetar (PD)
3. Blerina Gjylameti anëtare (PS)
4. Klotilda Bushka anëtare (PS)
5. Toni Gogu anëtar (PS)
6. Ermonela Felaj anëtare (PS)
7. Arben Pëllumbi anëtar (PS)
8. Blendi Klosi anëtar (PS)
9. Klevis Xhoxhi anëtar (PS)
10. Etilda Gjonaj anëtare (PS)
11. Oerd Bylykbashi anëtar (PD)
12. Dashnor Sula anëtar (PD)
13. Grida Duma anëtare (PD)
14. Kreshnik Çollaku anëtar (PD)
15. Lindita Metaliaj anëtare (PD)
16. Fatmir Mediu anëtar (Grupi Parlamentar Aleanca për Ndryshim)
17. Shpëtim Idrizi anëtar (Grupi Parlamentar Demokraci dhe Integrim)
18. Petrit Vasili anëtar (LSI)