“Komisioni Tahiri”, Edi Paloka: Të shkarkohen Xhafaj dhe Veliu!
Kryetari i Komisionit Hetimor për të kontrolluar veprimet dhe mosveprimet e organeve shtetërore në parandalimin dhe goditjen e fenomenit të kultivimit dhe trafikut të lëndëve narkotike, duke përfshirë cështjen për të cilën prokuroria po heton Saimir Tahirin, Ish-ministrin e Brendshëm, Edi Paloka përmes një letre drejtuar Kryetarit të Parlamentit, Gramoz Ruçi, akuzoi Ministrin e Brendshëm se ka penguar qëllimisht Komisionin duke fshehur informacionin dhe dokumentat dhe i kërkoi shkarkimin si të Fatmir Xhafajt ashtu edhe Drejtorit të Policisë, Ardi Veliu.
“Edhe pse Komisioni Hetimor, që prej muajit Prill 2018, ka kërkuar informacione nga Ministria e Brendshme dhe Policia e Shtetit, deri më sot, në kundërshtim me Kushtetutën dhe me ligjin, Komisionit nuk i është vënë në dispozicion asnjë e dhënë apo dokumentacion i kërkuar, duke pamundësuar punën e tij, “ thekson Edi Paloka
Kryetari i Komisionit Hetimor shprehet se “pengimi i Komisionit Hetimor është bërë me qëllim për të fshehur gjurmët e lidhjes së Qeverisë me krimin e organizuar dhe për asgjësimin e informacioneve dhe provave që përfshijnë në veprimtari kriminale vëllain e dënuar për trafik droge të Ministrit aktual të Brendshëm Fatmir Xhafaj, si dhe vetë eksponentët e lartë të Partisë Socialiste si Saimir Tahiri, Fatmir Xhafaj, Taulant Balla, Jyrgys Çyrbja, etj. “
Kontrolli parlamentar është mekanizmi i vetëm se si opozita mund të perfaqësojë dhe mbrojë interesat e qytetarëve në Parlament, thekson Edi Paloka duke shtuar:.
“Për këtë qëllim, kërkojmë nga Kuvendi i Shqipërisë qëndrim të prerë ndaj aktit të pengimit të veprimtarisë së Komisionit Hetimor, duke marrë masat e duhura për të vënë përpara përgjegjësisë politike dhe ligjore Ministrin e Brendshëm dhe Drejtorin e Përgjithshëm të Policisë së Shtetit. Pengimi i qëllimshëm i Komisionit Hetimor përbën shpërdorim detyre, që sjell shkarkim nga detyra dhe përgjegjësi penale.”
Duke vënë në dukje përfundimin e afatit të Komisionit Hetimor sot, më 5 Shtator Kryetari i Komisionit Hetimor, Edi Paloka, kërkoi në emër të Partisë Demokratike shtyrjen me 3 muaj të tjerë të veprimtarisë së Komisionit.
Komisioni Hetimor u ngrit këtë vit për të kontrolluar përfshirjen e qeverisë, nëpërmjet Ministrit të Brendshëm Saimir Tahiri dhe Policisë së Shtetit në kultivimin dhe trafikimin e lëndëve narkotike, nuk ka dhënë asnjë rezultat.
