Kompania ajrore: Pasagjerët obezë duhet të blejnë dy bileta paraprakisht

Kompania ajrore Southwest Airlines së shpejti do t’u kërkojnë pasagjerëve që nuk mund të futen midis mbështetëseve të krahëve të ulëseve të tyre të paguajnë paraprakisht për një ulëse shtesë, pjesë e një sërë ndryshimesh të fundit që po bën transportuesi. Rregulli i ri hyn në fuqi më 27 janar, të njëjtën ditë që Southwest fillon të caktojë ulëset, raporton Associated Press.

Aktualisht, pasagjerët më të mëdhenj mund të paguajnë paraprakisht për një ulëse shtesë me mundësinë për të marrë një rimbursim më vonë, ose mund të kërkojnë një ulëse shtesë falas në aeroport pak para fluturimit të tyre. Sipas politikës së re të linjës ajrore, rimbursimet janë ende të mundshme, por nuk garantohen më.

Përfitimet po hiqen gradualisht njëra pas tjetrës. Përmes një deklarate, Southwest tha se po përditësonte disa nga politikat e saj ndërsa përgatitet për caktimin e ulëseve të vitit të ardhshëm. “Për të siguruar hapësirë, ne po i këshillojmë klientët që më parë përdornin politikën e ulëseve shtesë të blejnë një në kohën e rezervimit,” thekson kompania ajrore Sothwest.

Southwest Airlines thotë se do të vazhdojë të rimbursojë biletën e dytë sipas politikës së saj të re të ulëses shtesë nëse avioni nuk është i mbushur plotësisht në momentin e nisjes dhe të dy biletat janë blerë në të njëjtën klasë tarife.

Pasagjeri duhet gjithashtu të kërkojë një rimbursim brenda 90 ditëve nga fluturimi. Nëse një pasagjer që ka nevojë për një ulëse shtesë nuk e blen atë paraprakisht, politika e re kërkon që ai ta blejë atë në aeroport. Nëse fluturimi është i plotë, pasagjeri do të transferohet në një fluturim tjetër.