Kompanitë gjermane vazhdojnë të realizojnë të ardhura të mëdha në Rusi

Në Rusi vazhdojnë të jenë aktive mbi 260 kompani gjermane që realiozjnë një xhiro prej mbi 23 miliardë dollarë.

“Kompanitë gjermane, në vitin 2022 i kanë paguar tatim shtetit rus 402 milionë dollarë,” raporton ARD duke ju referuar të dhënave të School of Economics nga Kievi.

Sipas këtyre të dhënave, në Rusi aktualisht janë aktive 262 kompani të cilat kanë realizuar në vitin 2022 xhiro prej 23.2 miliardë dollarë. Pas sulmit të Rusisë në Ukrainë në shkurtin e vitit 2022, një numër i madh i kompanive gjermane braktisën Rusinë, por një numër shumë i madh prej tyre, rreth dy të tretave, vazhduan të jenë aktive në këtë vend.

Xhiron më të madhe vjetore, vitin e kaluar e ka realizuar në Rusi, kompania tregtare Metro, me 3.4 miliardë dollarë. Përfaqësuesit e kësaj kompanie, për të përditshmen gjermane Frankfurter Allgemeine Zeitung deklaruan se me biznesin e tyre në Rusi nuk shkelin sanksionet të cilat i ka vendosur Bashkimi Evropian pas sulmit rus në Ukrainë.

“Biznesi jonë i përgjigjet plotësisht kërkesave që përcaktojnë sanksionet e BE,” deklaruan përfaqësuesit e kompanisë Metro që deklaruan se do të vazhdojnë të qëndrojnë në Rusi. Kompania e dytë gjermane e renditur me xhiron e saj në Rusi, kompania energjetike Uniper, paralajmëroi largimin së shpejti nga ky vend.

Edhe kompanitë tjera gjermane aktive në Rusi, sipas ARD, nuk i shkelin sanksionet e BE. Nga kompanitë perëndimore përveç atyre gjermane janë aktive në Rusi vetëm kompanitë amerikane të cilat në vitin 2022 kanë realizuar një xhiro prej 40 miliardë dollarë dhe në arkën ruse të shtetit kanë paguar 712 milionë dollarë tatim.

Nga kompanitë perëndimore aktive në Rusi numri më i madh i tyre realizojnë të ardhura me shitjen e duhanit dhe alkoolit ku kryesojnë ajo japoneze “Japan International Tobacco” dhe amerikane “Philip Morris”. Në mesin e kompanive perëndimore të ardhurat më të mëdha i ka shënuar kompania zvicerane “Nestle”.