Kompromis me Vettingun, KPK konfirmon në detyrë Kreun e Gjykatës së Lartë

Kryetari i Gjykatës së Lartë, Xhezair Zaganjori, është rikonfirmuar në detyrë nga Komisioni i Pavarur i Kualifikimit. Në fundjavën e kaluar, Zaganjori u përball me KPK-në në një seancë që zgjati  disa orë.

KPK vlerësoi se Kreu i Gjykatës së Lartë pati bërë deklarime të pasakta të pasurisë dhe kontrata fiktive. Por ai u mbrojt duke thënë se kontratat ishin formale për pronën dhe brenda ligjit.

 Zaganjori ka deklaruar një apartament 293 metra katrorë në rrugën “Dedë Gjo Luli” në Tiranë; një dyqan i deklaruar si bibliotekë; një bodrum 65 metra katrorë dhe një zyrë prej 15 metrash katrorë.

Të gjitha këto pasuri ndodhen në të njëjtën godinë, e cila është ndërtuar nga gjyshi i bashkëshortes së tij. Zaganjori pranoi se kontratat ishin fiktive, por brenda ligjit.

Zaganjori, ish-diplomat,  është një prej gjyqtarëve të vjetër në sistemin e drejtësisë në vend. Nuk dihet nëse ONM do të pajtohet me vendimin e KPK-së, apo do të ndiqet e njëjta strategji si në rastin e Bashkim dedjas, kryetarit të Gjykatës Kushtetuese, I cili kaloi KPK por pritet që të përballet me KPA pas ankimimit të vendimit nga komisioneri publik.