Komshiç dhe Xhaferoviç refuzuan takimin me Lavrov. Mesazhi rus nga Beogradi…

Anëtarët e Presidencës së Bosnje Hercegovinës, Zhelko Komshiç dhe Shefik Xhaferoviç, kanë refuzuar takimin me ministrin e Punëve të Jashtme të Federatës Ruse, Sergey Lavrov, në Sarajevë.

Në një konferencë për media, sot të dy këta anëtarë të Presidencës së Bosnje Hercegovinës, kanë sqaruar se shkak për këtë ishte mungesa e flamurit shtetëror të Bosnje Hercegovinës në takimin me Lavrovin, si dhe mbështetja që ai i ka dhënë Rezolutës për neutralitet ushtarak, të cilën e ka miratuar Asambleja Kombëtare e Republikës Serbe, raporton RFE.

“Këtë e përjetojmë si një lloj poshtërimi dhe madje mohimi të institucioneve të Bosnje Hercegovinës, të vendit në të cilin ai erdhi për një vizitë zyrtare,” tha Komshiç duke shtuar se mesazhet që dha Lavrovi, pas arritjes së tij për vizitë zyrtare në Bosnje Hercegovinë, më 14 dhjetor, nuk janë mesazhe të tij personale, por të shtetit të cilin e përfaqëson.

“Deklarata e zotit Lavrov, në të cilën ai mirëpret Rezolutën e Asamblesë Kombëtare të Republikës Serbe, e cila flet për të ashtuquajturin ‘neutralitet ushtarak’ në rast të anëtarësimit në një asociacion ushtarak, gjithashtu tregon që një ministër rus, i cili është i informuar në mënyrë të përkryer dhe me përvojë ,shmang faktin se vetëm autoritetet e Bosnje-Hercegovinës mund të marrin një vendim të tillë. Do të thotë që Bosnje-Hercegovina ka marrë vendime në lidhje me të ardhmen e saj në integrimin euro-atlantik, ndërkaq në vendime mori pjesë edhe Dodik, me të cilin ai u takua,” tha Komshiç duke shtuar se në bazë të këtyre dy shembujve, mendon që fatkeqësisht, Lavrov tregoi mosrespekt për institucionet dhe sistemin kushtetues dhe shtetin e Bosnje Hercegovinës.

Një ditë më parë, Lavovr ndër të tjera tha se Zyra e Përfaqësuesit të Lartë në Bosnje Hercegovinë duhej të ishte mbyllur shumë kohë më parë, sepse Bosnje Hercegovina, siç theksoi ai, shumë kohë më parë është bërë anëtare e Këshillit të Sigurimit të Kombeve të Bashkuara.

“Ky protektorat i huaj, i cili përfaqëson Zyrën e Përfaqësuesit të Lartë në Bosnjë e Hercegovinë, është plotësisht i tejkaluar. Ekzistenca e OHR-së tregon mosrespektim për popujt e Bosnje-Hercegovinës dhe sovranitetin e këtij vendi. Çdo përpjekje për të përmbysur Marrëveshjet e Dejtonit mund të ketë pasoja të paparashikueshme. Ka qenë shumë i vështirë ndërtimi i një ekuilibri të brishtë dhe vetëm pa njërin komponent, mund të rrezikohet i gjithë stabiliteti i përgjithshëm,” tha Lavrov.

Anëtari i Presidencës së Bosnje Hercegovinës, Shefik Xhaferoviç tha se Federata Ruse është një shtet i madh, një fuqi botërore, se Bosnje Hercegovina nuk është e tillë, por është një shtet shumë i rëndësishëm në botë.

“Ne kemi krenarinë tonë dhe duam të themi atë që mendojmë për momentin. Rusia e respekton Marrëveshjen e paqes së Dejtonit, por deklaratat e dhëna dje në një konferencë shtypi nga ministri Lavrov, na thonë diçka tjetër,” tha Shefik Xhaferoviç duke shtuar se respektimi i Marrëveshjes së paqes së Dejtonit, do të thotë t’i respektosh të gjitha anekset e saj.

“Gjëja e parë që theksohet në marrëveshje, është shteti i Bosnje-Hercegovinës, vazhdimësia e tij, institucionet, flamuri dhe stema e tij. Kjo duhet të respektohet, por që nuk u respektua dje. Të respektosh Marrëveshjen e Dejtonit do të thotë të respektosh të gjitha 11 anekset,” tha Xhaferoviç.

Kryesuesi i Presidencës së Bosnje Hercegovinës, Millorad Dodik, është takuar sot me ministrin e Jashtëm rus, Sergej Lavrov, në Sarajevë, ka njoftuar më herët presidenca. Më pas, Lavrov është takuar edhe me ministrin e Jashtëm të Bosnje Hercegovinës, Biser Turkoviç.

Mesazhi i Lavrov nga Beogradi

Sjellja e Lavrov në Beograd i tha plotësisht të drejt Komshiçit dhe Xhaferoviçit që nuk takuan këtë provokator promitiv rus i cili vetë diplomat nuk është.

Sapo shkeli në tokën serbe foli për formimin e Asociacionit të Komunave Serbe në Kosovë. Pas takimit me ministrin e Jashtëm serb, Nikolla Selakoviç në Beograd, ministri rus i Punëve të Jashtme, Sergey Lavrov, tha se Rusia shpreh keqardhje që Bashkimi Evropian nuk mund të ndikojë në përmbushjen e marrëveshjeve të arritura më parë, në negociatat midis Beogradit dhe Prishtinës

“Ne besojmë se një qëndrim i tillë tregon pafuqinë karshi veprimeve të Prishtinës dhe ne ende i bëjmë thirrje BE-së që të kuptojë plotësisht përgjegjësinë për përmbushjen e asaj që u ra dakord me ndërmjetësimin e saj,” tha Lavrov duke u bërë sikur nuk ka informacione se Serbia nuk ka zbatuar asnjërën prej zotimeve që janë pjesë e Marrëveshjeve madje edhe lëvizjen e lirë të njerëve e ka selektive.

Pas takimit, raporton RFE, Selakoviç dhe Lavrov nënshkruan planin e punëve të jashtme të të dy vendeve për 2021/2022.

Lavrov tha se gjatë takimit u diskutuan hapat e mëtejshëm të përbashkët të bashkëpunimit në organizatat ndërkombëtare, duke përfshirë Kombet e Bashkuara, OSBE-në, Këshillin e Evropës dhe Bashkimin Ekonomik Euroaziatik.

Ministri i Jashtëm serb tha se kishte shkëmbyer mendime me homologun e tij rus mbi çështjen e pozicioneve të rëndësishme ndërkombëtare, “në të cilën ne shpesh ndajmë të njëjtën pikëpamje.” Ai falënderoi Federatën Ruse për mbështetjen e saj parimore ndaj Serbisë në çështjen e integritetit territorial dhe sovranitetit në nivelin ndërkombëtar.

“Bashkëpunimi midis dy vendeve tona dhe diplomacia është në një nivel jashtëzakonisht të lartë dhe numri i fushave në të cilat ekziston ai bashkëpunim po zhvillohet veçanërisht pas vizitës historike të Vladimir Putin (presidenti i Rusisë) në janar të vitit 2019”, tha Selakoviç.

Ndryshe, Lavrov arriti në Serbi pas një vizite në Bosnje Hercegovinë. Më herët, ai sot mori pjesë në një ceremoni në Varrezat e Çlirimtarëve të Beogradit, së bashku me presidentin e Serbisë, Aleksandar Vuçiç.

“Rusia dhe Serbia nuk pranojnë përpjekjet për të rishikuar historinë e Luftës së Dytë Botërore”, tha Lavrov pas ceremonisë.

Ndërsa Vuçiç tha se Rusia gjithmonë mund të llogarisë në Serbinë “si një mik i përhershëm”.

“Dhe kjo është arsyeja pse detyra jonë sot është të luftojmë kundër rishkrimit të historisë”, tha Vuçiç.