Koncesionarët pushtojnë gjykatat, padi kundër institucioneve të Edi Ramës
Ditët e fundit të paktën tre kompani që kanë kontrata koncesionare me qeverinë apo që kanë pasur një të tillë dhe është zgjidhur në mënyrë të njëanshme kanë paditur institucionet pranë Gjykatës Administrative të Apelit.
Bëhet fjalë për kompani të rëndësishme siç është GFI Albania e cila ka një kontratë koncesionare për markimin e karburantit në vend, gjermanët e EMS (Albanin Port Operator), që kanë koncesionin e menaxhimit, operimit, ndërtimit, mirëmbajtjes dhe përmirësimit teknik dhe adaptimi i Terminali Lindor në Portin e Durrësit. E treta është kompania që kishte kontratën koncesionare për ndërtimin e hidrocentraleve mbi Osum dhe që u zgjidh nga qeveria pas vlerësimit që u bë nga Ministria e Turizmit dhe Mjedisit për problemet e vlerësimit të ndikimit në mjedis.
Çfarë kërkojnë koncesionarët në Gjykatë
“GFI Albania” shpk ka paditur Komisionin për Shqyrtimin e Apelimeve Tatimore pranë Ministrisë së Financave dhe Ekonomisë si dhe Drejtorinë e Tatimpaguesve të Mëdhenj duke kërkuar që të shfuqizohen aktet e vlerësimit tatimor që i përkasin majit të vitit të kaluar si dhe vendimit të nxjerrë më pas ankimimit nga Komisioni për Shqyrtimin e apelimeve tatimore.
Shoqëria HP Bigas dhe Veleshnje Energy shpk e cila do të ndërtonte HEC-et mbi lumin Osum pasi humbi betejën në Gjykatën Administrative të Shkallës së parë ka dërguar këtë çështje tek Apeli duke paditur Ministrinë e Turizmit dhe Mjedisit, Agjencinë Kombëtare të Mjedisit dhe atë të Zonave të Mbrojtura për një vendim të vitit të shkuar që kishte edhe rolin kryesor në zgjidhjen e kontratës koncesionare nga ana e qeverisë shqiptare. Po kështu ajo kërkon detyrimin e palës së paditur që të nxjerrë aktin e miratimit të vlerësimit të ndikimit në mjedis për projektin.
Kompania e tretë EMS Albanian Port Operator shpk ka paditur Drejtorinë Rajonale Tatimore të Tatimpaguesve të Mëdhenj në Tiranë lidhur me një vlerësim tatimor të bërë vitin e shkuar nga kjo drejtori dhe që kundërshtohet nga kompania./Monitor/
