Koncesioni i ri 100 mln euro, PD kërkesë KQZ: Qeveria po shkel rregullat e zgjedhjeve, merrni masa!

Partia Demokratike denoncoi sot koncesionin e ri të hidrokarbureve duke e cilësuar si shkelje të rregullave të përbashkëta për zgjedhjet e 25 Prillit. Për këtë arsye, PD i kërkoi KQZ të marrë masa për respektimin e Kodit Zgjedhor.

Në kërkesën e Partinsë Demokratike drejtuar Komisionit Qendror të Zgjedhjeve citohet rregulli i shkelur nga qeveria.

“4 muaj para datës së zgjedhjeve, deri ditën e zgjedhjeve ndalohet dhënia e kontratave publike të koncesionit/partneritetot publik privat (PPP), për të cilat nuk është bërë njoftim publik se do të zhvillohen, nuk janë vijim i një procedure koncesionare të identifikuar dhe nisur apo nuk janë parashikuar për t’u financuar nëpërmjet buxhetit të miratuar të vitit zgjedhor”.

Procedurat e koncesionit, që sipas Partisë Demokratike do t’u kushtojë qytetarëve 100 milionë euro për 10 vjet, u bënë publike gjatë periudhës së ndaluar nga Kodi për nxjerrjen e të tilla akteve nga qeveria.