Koncesioni i Sterilizimit, SPAK i komunikon Ish-Ministrit Beqaj akuzën: Shpërdorim detyre!

Pasi ka përfunduar hetimet për koncesionin e sterilizimit, sot SPAK i ka komunikuar të pandehurit ish-ministër i Shëndetësisë, Ilir Beqaj, akuzën për “shpërdorim detyre”.

Në përfundim të kësaj procedure nga ana e Prokurorisë së Posaçme, ashtu si çdo asqer i Edi Ramës, edhe Beqaj para mediave ka mohuar akuzën e shpërdorimit të detyrës duke i shprehur i hapur për hetime.

Ndryshe ish-ministri dhe tetë ish-zyrtarë e biznesmenë, janë zyrtarisht nën akuzë nga SPAK për koncesionin e sterilizimit.

Hetimet

Hetimet trevjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanive të Ilir Rrapajt dhe shtetasit Italian, Umbro Staccini.

Lista e shkeljeve përmban një studim fizibiliteti me të dhëna të rreme në kundërshtim me ligjin; hartimi i kritereve në mënyrë të tillë që t’u përshtateshin gjendjes reale të kompanive të përzgjedhura paraprakisht si dhe mosveprimin e Beqajt për zgjidhjen e konfliktit të interesit mes Rrjepajt si kryetar i komisionit të koncesionit dhe Rrapajt si përfitues i tij.

Shkelje ligjore janë gjetur edhe gjatë negocimit të kontratës koncesionare, që sipas gjyqtarit kanë qenë “dukshëm në favor të kompanisë së shpallur fituese, në dëm të interesave të shtetit”.

Pas hetimeve trevjeçare të kryera nga SPAK, emri i Beqajt mungoi fillimisht në listën e personave të akuzuar për shpërdorim detyre dhe mashtrim me pasoja të rënda, por në një vendim për masë sigurie, gjyqtari vlerësoi se shkeljet e akteve ligjore ngriheshin në nivelin e përgjegjësisë penale për Beqajn.