Konferencë Mbarëkombëtare e Arkivistikës në Tuz të Malit Zi, DPA thirrje…
Me qëllim të diskutimit të problematikave, metodologjisë së studimit, digjitalizimit, përmirësimit të infrastrukturës së përmbajtjes, inovacionit, si dhe vizionit të punës së arkivave në realitetet e sotme nga ekspertë dhe studiuesë të arkivave të vendeve shqipfolëse dhe të arkivave të rajonit, këtë vit Drejtoria e Përgjithshme e Arkivave në bashkëpunim me Agjencinë Shtetërore të Arkivave të Kosovës dhe Komunën e Tuzit, më datë 5 Qershor 2021 në qytetin e Tuzit në Mal të Zi do të organizojnë Konferencën e V Mbarëkombëtare të Arkivistikës.
“Drejtoria e Përgjithshme e Arkivave ju bën thirrje studiuesëve, nëpunësëve të institucioneve dhe të gjithë të interesuarëve të kësaj fushe të marrin pjesë në konferencë me studime, ide dhe propozimet e tyre sepse veç arkivistëve të rrjeteve arkivore kombëtare, ftesa për pjesëmarrje u drejtohet të gjithë profileve të tjerë të arkivistëve, institucioneve që ruajnë apo atyre që ndërveprojnë me ruajtjen e kujtesës kolektive,” tha Drejtorja e Drejtorisë së Evidencës Qëndrore dhe Komunikimit, Elsa Saka, duke saktësuar se për më shumë informacion mund të konsultohen edhe njoftimet në faqen zyrtare të Drejtorisë së Përgjithshme të Arkivave www.arkiva.gov.al dhe Agjencisë Shtetërore të Arkivave të Kosovës asha-ks.net
Temat që propozohen për diskutim lidhen specifikisht me arkivistikën, të drejtat e njeriut dhe me historinë e arkivave apo institucioneve arkivore në zonat shqipfolëse:
– Crowd sourcing: konteksti dhe metadatat e dokumenteve të krijuara prej përdoruesit
– Automatizimi i arkivave dhe etika
– Siguria kibernetike dhe administrimi i të dhënave
– Risitë digitale dhe shfrytëzimi i dokumentacionit
– Zhvillimi i njëtrajtshëm përmes bashkëpunimit me komunitetin
– Trashëgimia arkivore e përbashkët, përtej kufijve gjeografikë
– Arkivat, përgjegjësia, aksesi në të dhënat dhe mbrojtja e të dhënave personale
– Bashkëpunimi rajonal në fushën e arkivave dhe trashëgimisë kulturore arkivore
– Trafiku ilegal i trashëgimisë dokumentare
– Etika dhe arkivat
– Ndryshimet klimaterike dhe arkivat
– Trajnimi arkivor dhe përmirësimi profesional
– Turizmi dhe promovimi i arkivave
Afati i pranimit të abstrakteve është deri më datë 2 Prill 2021 në gjuhët shqip dhe anglisht dhe do të dërgohen në faqet zyrtare të Arkivit të Shqipërisë dhe Kosovës.
