Konferencë për Libinë, Putin arrin në Berlin me optimizëm

Presidenti i Rusisë, Vladimir Putin tha sot në prag të Konferencës për Libinë në  Berlin se shpreson që ajo do të sjellë përparim ndërsa përpjekjet e para paqësore, sipas tij, kanë dhënë rezultate.

“Nuk humbim shpresën se dialogu do të vazhdoj dhe se konflikti do të zgjidhet,” tha Putin në prag të takimit me presidentin e Turqisë, Recep Tayyip Erdogan, në kuadër të Konferencës në Berlin.

Rusia dhe Turqia, tha Putin, kanë ndërmarrë një hap shumë të mirë duke kërkuar nga palët në konflikt që të ndërpresin luftën, dhe shumë aksione ushtarake në Libi tashmë janë ndërprerë.

Erdogan tha se gjenerali Kalifa Haftar i cili nga prilli i vitit 2019 po zhvillon betejën për marrjen e Tripolit, duhet të heqë dorë nga qëndrimet e tij agresive në mënyrë që ti hap rrugë procesit politik.

“Në mënyrë që të realizohen fazat tjera të procesit politik dhe të arrihet zgjidhja, qëndrimi agresiv i Haftarit duhet të ndërpritet,” tha Erdogan për televizionin turk para takimit me Putinin.

Ndryshe, liderët e shteteve më të rëndësishme që janë përfshirë në konfliktin e Libisë sot takohen në Berlin, në përpjekje për të arrit paqen në këtë vend.

Organizatori i Konferencës është Gjermania, e në Berlin ndër të tjerë janë presidentët rus dhe ai turk, shefi i shtetit francez, Emmanuel Macron, si dhe Presidentja e Komisionit Europian, Ursula von der Leyen.

Në takim marrin pjesë edhe gjeneral Haftari dhe kundërshtari i tij dhe kreu i qeverisë së unitetit kombëtar, Fajez al-Saraj. Për Haftarin është konfirmuar se mbrëmë ka mbërritur në Berlin. Ndryshe, Libia ëshë e ndarë në mes të qeverisë së unitetit kombëtar, GNA, e cila pranohet nga OKB, me seli në Tripoli, dhe pushtetit të gjeneral Haftarit e cila ka selinë në lindje të vendit.