Konfirmohet, Qeveria e Kosovës: Kurti ishte në dijeni për planin e atentatit ndaj tij!
Pas lajmit se me hackerimin e e-mailit të Ish-Drejtorit të Përgjithshëm të Policisë së Shtetit, Gledis Nano doli në pah që në vitin 2021 ishte zbuluar një plan për të ekzekutuar Kryeministrin e Kosovës, Albin Kurti, ka reaguar Zyra për Komunikim Publik e Qeverisë së Kosovës duke konfirmuar se Kryeministri Albin Kurti, ishte në dijeni për planin e atentatit ndaj tij në vitin 2021.
“Kryeministri i Republikës së Kosovës, Albin Kurti ka qenë i njoftuar për këtë rast nga Agjencia e Kosovës për Inteligjencë. Institucionet e sigurisë i kanë ndërmarrë të gjitha masat për parandalimin e këtij veprimi. Rasti nuk është bërë publik për të mos përhapur panik,” thuhet në përgjigjen e Zyrës për Komunikim me Publikun në Qeverinë e Kosovës.
Ndryshe, me hackerimin e e-mailit të Ish-Drejtorit të Përgjithshëm të Policisë së Shtetit, Gledis Nano, u mësua se në vitin 2021, Njësia Kundër Terrorizmit në Kosovë ka zbuluar një plan për të ekzekutuar kryeministrin e Kosovës, Albin Kurti, ish-anëtarin e Shërbimit Informativ të Kosovës, Ismet Haxha dhe ish-deputetin e PDK, Xhavit Halitit, nga shtetasi nga Shqipëria, Prek Kodra, për të cilin dokumenti thotë se ka aftësi të mira në përdorimin e snajperëve. Gjithçka thuhet se bëhej për të sjellë destabilizime në Shqipëri dhe Kosovë.
