Konfirmon kërcënimin, Vuçiç: Deklarata ime lidhur me Nagorno Karabakun, e saktë!

Presidenti i Serbisë, Aleksandar Vuçiç, tha sot se deklarata e tij për Nagorno Karabakun, ndaj së cilës kanë reaguar ashpër një pjesë e zyrtarëve politikë të Kosovës, ka qenë mjaft e saktë dhe precize.

“Kam folur për nevojën që të shmangim politikën e konfliktit të ngrirë. Unë thashë që konflikti në Nagorno Karabak ka qenë i ngrirë dhe më pas është shkrirë dhe se kushdo në të ardhmen mund të na çojë drejt një katastrofe dhe deri te një konflikt, gjë që nuk na nevojitet,” ka sqaruar Aleksandar Vuçiç në ceremoninë e vendosjes së gurthemelit të ndërtimit të një terminali hekurudhor në Batajnicë duke shtuar:

“Me këtë kam shprehur dëshirën që të krijojmë paqen dhe të bëjmë zgjidhjen me kompromis. Për çdokënd kjo ishte e qartë. Kosova i ka arsyet e veta dhe përplasjet e brendshme.”

Në fund, ai gjithçka e përforcoi duke theksuar se kjo është politika e Serbisë, pra e do anëtarësimin në BE por edhe luftën për Kosovën.

“Për mua është e rëndësishme që të ruajmë paqen. Kjo është politika e Serbisë dhe kjo do të mbetet politika e Serbisë.”

Ndryshe, të enjten, pas një takimi me ambasadorët e Quintit, Vuçiç tha se në Kosovë mund të ndodhë një konflikt i llojit të Nagorno Karabakut nëse përpjekjet për kompromis dështojnë.

“Konflikti në Nagorno Karabak ka treguar shembullin e një konflikti të ngrirë, por kur dikush e shkrin atë, mund të përshkallëzojë në një katastrofë të vërtetë,” tha Vuçiç të enjten.

Kjo deklaratë në Prishtinë nxiti reagime, ku ushtruesja e detyrës së presidentit të Kosovës, Vjosa Osmani dhe kryeministri i Kosovës, i bën thirrje Bashkimit Evropian dhe NATO-s, që të reagojnë për këto komente të presidentit serb.

BE dhe NATO, në përgjigjet dhënë për RFE, nuk pranuan që të komentojnë deklaratat e presidentit Vuçiç.

NATO tha se vazhdon ta mbështesë dialogun ndërmjet Kosovës dhe Serbisë, ndërkaq, BE bëri thirrje që palët të krijojnë atmosferë që do të ndihmonte në stabilitetin rajonal dhe bashkëpunimin.