Kongresi i kçkistëve/ Më i paqartë së në vitin 2013, Edi Rama: Tani me sopatë!
U paralajmërua si një prezantim i Paketës Speciale AntiKÇK, por Edi Rama bëri sot vetëm atë që din të bëjë më së miri, SPEKTAKLIN!
I mungoi Ardit Gjebrea dhe Telebingo Shqiptare, por Kryeministri Edi Rama kishte kuruar çdo detaj që transmetohej nga tribuna por kishte harruar ata që kishte përballë në sallë, dhe ishin pikërisht kçkistë të thekur që pas 6 vite të qeverisjes rilindase asnjë paketë në botë nuk u bën derman, përveç asaj që e tha në fund: SOPATA!
Akuzoi të gjithë si ata që janë pjesë e sistemit të drejtësisë ashtu dhe ata që janë pjesë e administratës qëq drejton, madje sot pas 2500 ditë qeverisjeje I thotë popullit shqiptar se administrata do të kthehet nga gjobëvënës të qytetarëve në shërbëtorë të tyre.
E nisi nga viti i dështimit të madh ndonëse e konsideron si viti më i vështirë:
“Ky ka qenë viti më i vështirë i qeverisjes sonë. Shqipëria nuk arriti të çelë negociatat me BE. Ne themel të asaj përpjekje ka qenë frika, frika nga drejtësia. Frika nga drejtësia e lidhur me mundësinë reale të çeljes së negociatave që dihet se vjen një proces ballafaqimi mes vendit kandidat dhe negociatave.
Gjithë reforma në drejtësi, gjithë bagazhi ligjor i krijuar në këto vitet e fundit korrespondon me kapacitetet e Sistemit të Drejtësisë, për të gjykuar pavarësisht statusit social, apo influencës apo forcës të individëve të caktuar. Adresim i korrupsionit deri në nivelet më të larta, kjo ka qenë në themel të gjithë asaj përpjekje që kulmoi me një situatë absurde dhe sureale në procesin zgjedhor.
Nga ana jonë ne i bëmë të gjitha përpjekjet me një mundim të posaçëm për të komunikuar dhe balancuar të gjithë efektin e baltës së hedhur ndërkombëtarësh në vendin tonë. Duke filluar me një vend që është kyç në vendimmarrje, që është Gjermania, na ishte krijuar një barrierë domethënëse me partinë Kristian Demokrate që është partia kryesore e koalicionit.
Fakti që Gjermania kolaudoi me një po të Bundestagut është një provë që tregon se përpjekjet tona ishin të suksesshme. Në mungese të vendimi për çeljen e negociatave, kemi një udhërrëfyes për vazhdimin e procesit të integrimit në BE,” tha Edi Rama duke rënë në kundërthënie me ato që vetë i nxjerr nga goja. Shqipëria që ai qeverisë është gati për çeljen e negociatave me BE, dhe menjëherë pas këtij konstatimi duke iu përgjigjur në reagimi qytetarë që thuhej se vinte në kohë reale nga rrjetet sociale se “njerëzit po vdesin për bukë, në spital të lënë të vdesësh po nuk u dhe lekë, prisnim shumë, por edhe ju si gjithë të tjerët,” e mohoi ekzistencën e këtyre rasteve por edhe nëse ka, janë pakicë. Pra, ekzistojnë!
“Kjo është një tjetër qasje që shpreh një frustrim që nuk është në një kategori të ngushtë, por të gjerë njerëzish dhe që lidhet jo me atë që ishte, por që duhet të jetë dhe me pritshmërinë, por duke qenë se jetojmë në një botë që në tërësi, por edhe në veçantinë e mikrobotës sonë ushqehet me toksina dhe helmohet me lajmin e keq, gënjeshtrën, shpifjen, manipulimin, mbetemi në një pozicion të vështirë në raport me të vërtetën dhe ecurinë objektive të gjërave.
Sot në vend bëhen 60 mijë operacione kirurgjikale dhe në total duke përfshirë edhe mikrokirugjinë shkojmë në 95 mijë në vit, mund të ndodhë që të ketë një dështim, një skandal, dhe krijojnë një atmosferë ku është vërtetë e vështirë që njeriu i zakonshëm që e ndjek jetën nga televizori të racionalizojë këtë raport, por ajo që mund të them se opinioni për mjekësinë, mbetet nga shumica që nuk ka pasur lavdi zotit të marrë shërbim.
Kurse i atyre që marrin shërbim është shumë herë më pozitiv për shkak se e prekin direkt eksperiencën e ndryshimit të madh që ka ndodhur. Nuk është e vërtete që të lënë të vdesësh po nuk dhe lekë kur shkon te mjeku dhe nëse ka një të vërtetë të pamohueshme që në trupën e bluzave të bardha ka të tillë që e njollosin këtë bluzë, e vërteta tjerët është se këta janë pakicë. E them me bindje se e ndjek çdo ditë. Po aq sa e vërtetë edhe se sa më shumë të bëhet, aq më shumë kërkohet.”
Duke folur për karshillëkun që I bënë “Fundjavës ndryshe” me ndërtimin e shtëpive me mjete shtetërore, Edi Rama gjeti momentin tëflas edhe për vilën e tij të shumëpërfolur në Surrel. Nuk tregoi se si mund të jetohet dhe ndërtohet me 3.000 euro sa I kishte deklaruar por arsyetimin e bëri në mënyrën e vet:
“Ne kemi bërë një inventar me ministren Ogerta Manastirliu në funksion të një programi për të ndihmuar familje që janë shëmbëlltyrë e mjerimit. Janë shtëpi që bëjnë lajm dhe kur shfaqen në rrjete sociale bëhen virale. Inventari që kemi bërë tregon se këto shtëpi nga Tropoja deri në Konispol janë 1600 e pak. Por sa janë vilat si puna e asaj të Surrelit?
Këtu kam parasysh shtëpitë me 2,3,4 kate që kanë qenë produkt i punës dhe për ato që nuk kanë qenë produkti i saj do flasim më pas.
Vila ime ka një formë të ndryshme, siç jam unë i ndryshëm nga të tjerët. Në raport me tërësinë e banesave individuale të shqiptarëve është një banesë e një familje shqiptare më shumë. Kaq! Për të gjithë ata që kanë hedhur baltë lidhur me këtë mund të them që shtëpia ime është e deklaruarën çdo detaj dhe faturë dhe do isha i lumtur nëse me të gjithë bashkëjetuesit do binim dakord të bënim një sqarim shtëpi më shtëpi për të ardhurat dhe sa korrespondojnë me produktin,” tha Edi Rama duke shfajësuar veten edhe pse nuk është transparent për të bërë dallimin nga ata që ai i konsiderohen Grup i Strukturuar Kriminal dhe organizatën e pagëzon KÇK. Dhe jo vetëm kaq!
Pas gjashtë vjet të qeverisjes, ku çdo vit e ka vlerësuar si të suksesshëm, sot Kryeministri në Kongresin e stërmbushur me kçkista paralajmëron administratën se do të kthehet nga gjobëvënës të qytetarëve në shërbëtorë të tyre edhe pse kje e fundit është misioni I vetëm që mund të ketë një administratë.
Edi Rama tha sot se sportelistët (administrata) “na kanë nxirë faqen” ndonëse këta mikrob ai vetë i zëvendësoi me Portalin e Bashkëqeverisjes dhe nuk e spastroi administratën që e bëri nga e para:
“Jo çdo shërbim mund të bëhet online komplet. Nga 1 janari do të jenë 40% e shërbimeve që do të jepen online. Deri në qershor do të shkojmë në 67% dhe në fund të vitit do të jenë thuajse 100 për qind online. E para s’ka më kontakt midis qytetarit që shërbehet dhe atij që shërben, që na e nxinë jetën nëpër sportele. Qytetari duhet të aplikojë duke depozituar vetëm dokumentet e veta dhe jo ato që i jep shteti. Të gjitha të tjerat brenda që i jep shteti do t’i marrin ata që punojnë në sportele. Ata do kthehen nga gjobëvënës në shërbëtorë të qytetareve.”
Ndonëse kanë kaluar 6 vjet nga ardhja në pushtet, dhe ishte vetë Kryeministri ai i cili shpërndante si Babagjyshi i Vitit Ri i shoqëruar nga Lamçe, ca karton idiot të legalizimit me të cilët vetëm sa u thellua abuzimi me pronat dhe lindën ca konflikte të reja. Sot ai fol për Strategjinë e re për vijën bregdetare dhe legalizimet, duke thënë se situata e akumuluar prej vitesh do të marrë zgjidhje.
“Sa të fortë e kanë në dorë vijën bregdetare, jo të fortë si persona me precedentë penale, por të fortë të tipit si prokurorë. Sikur ta dini se sa prokurorë disponojnë të drejta mbi vijën bregdetare është të vësh duart në kokë, flasim për gjykatës që bëjnë gjykatës në orën e punës dhe marrin qira për mijëra euro metra katrorë plazh, këta të fortë. Po punojmë për ligjin e ri dhe regjimi mbi vijën bregdetare do të ndryshojë plotësisht.”
Por në këtë spektakël Edi Rama kishte dhe çaste sinqeriteti! Sot është më i paqartë se në vitin 2013.
“Unë bëj 6 vite mbledhje dhe dal më i paqartë se sa hyj. Tani me sëpatë, kjo pritet dhe të gjitha tokat që nuk janë në konflikt brenda vitit 2021 duhet tu jepen njerëzve. Shtëpitë në fshat do të legalizohen të gjitha, shtëpitë në qytet aty ku janë të palegalizueshme do të regjistrohen, me përjashtim të akseve kombëtare që nuk mund të ketë legalizim, regjistrim e as gje, pasi nuk ka shans njeri që ti marrë lekë buxhetit të shtetit për të mbajtur peng aksin kombëtar, nuk ka asnjë shans. Ça ti them unë asaj zonje që tha qeveria e poshtër më dha 130 mln lekë, po sa donte zonja, sa donte.”
Në fund, radha i erdhi sebepit të këtij Spektakli kçkistë, prokurorët dhe gjyqtarët të cilët janë në pritje të vetingut. Edhe pse mburret gjithandej për Reformën në Drejtësi dhe vettingun por sot Edi Rama do duhet t’i nënshtrohen një procesi administrativ për të dhënë llogari për pasuritë e tyre, bizneset apo automjetet.
“Njerëzit që s’kanë shanse të kalojnë vettingun dhe sot po e tregojnë veten. Sot ata nuk e kanë më jetën përpara, në kuptimin e karrierës, por kanë vetëm kohën e mbetur për të dalë para Komisionit të Vettingut, dhe motoja e tyre është “Kap ça t’kapësh”. Unë e kam dëgjuar nga ata. Rasti i Durrësit është me flagranti, u gjendën në një makinë, prokurori dhe një nga eksponentët e krimit të organizuar dhe në bagazhet e makinës, dokumentet e vjedhura nga prokuroria. Ato që për vite me radhe, vendoseshin kundër reformës në Drejtësi, dhe në kurriz të Donika Prelës.
Çfarë duhet të bëjmë në këto kushtet, do presim vetingun e tyre? Për shkak se kriminelët i kanë shpatullat e ngrohta, ka një paturpësi ekstreme dhe mungesë ekstreme, frike dhe kujdesi për të fshehur gjurmës. Çfarë do bëjmë ne kur një kriminel merr peng hipotekën e Vlorës, dhe Policia nuk arrin të veprojë për shkak se Gjykata nuk vepron.
Jemi në një vend ku të gjithë që jemi këtu, në 10 radhët e para keni plotësuar një formular ku përtej të gjitha standardeve ndërkombëtare u është kërkuar të tregoni të vërtetën qëkur keni dal nga barku i nënës. Keni shkelur vijat e bardha kur keni dal nga barku i nënës. Kjo bëhet për të gjithë ata që duan të punojnë në administratën shtetërore, po këta?
Ka ardhur koha që këta njerëz që janë dënuar për krime të rënda, që janë akuzuar për krime të rënda dhe nuk janë dënuar si rezultat i marrëdhënies me KÇK-në, apo janë të dënuar në vendet e BE-së, tha Kryeministrit, t’u kërkohet të deklarojnë pasuritë.
“T’u kërkohet të deklarojnë se ato që janë i kanë si rezultat i punës, pse kjo u bëka për të gjithë ata që duhet të zgjidhen, po për gjykatësit dhe prokurorët pse nuk u bëka për këta? Kush janë këta? Në këtë vakum mes drejtësisë së vjetër dhe drejtësisë së re që po ngrihen, dhe ku KÇK është në një veprim intensiv ne duhet të ndërhyjmë me një ligj special, kundër krimit të organizuar dhe terrorizmit.
Të gjithë ligjin antimafia ta kalojmë në kurrizin tyre dhe të familjarëve të tyre. Ata duhet të provojnë që shtëpinë, makinën, biznesin i kanë si rezultat i punës. Ky nuk është proces penal, por administrativ,” tha Edi Rama dhe ndonëse përballë kishte shumë nga ata që i nxinë faqen këtij vendi foli për një anëtar të KÇK-së , i cili shkel ligjin dhe askush nuk vepron.
“Është një proces administrativ dhe ndërkohë KÇK i duhet vënë një kufi shumë i qartë sepse jemi në kushtet kur një anëtar i KÇK shkel ligjin askush nuk vepron, ndërkohë që duhet sqaruar ligjërisht që KLP dhe KLGJ të marrin masë për pezullimin dhe inspektimin për anëtarin e kësaj organizate kriminale. Ndërkohë që deri në funksionimin e plotë të Inspektorit të lartë të Drejtësisë nëse nuk e bëjmë do bëhet nami në Shqipëri, do kemi çdo javë shfaqje tërbimi në shkelje të ligjit. Plus kësaj, nëse inspektimi vlerëson se anëtari i KÇK ka shkelur ligjin është në shkelje mbi të duhet të fillojë procesi antimafia,” tha duke përfunduar Kryeministri Edi Rama i bindur se gjithçka ishte shterruar në sqarimet e tij në prezantimin e paketës kundër KÇK, por e pa të udhës se ka vend edhe për kërcënim për deputetët e tij socialist nëse refuzojnë ta votojnë:
“Kush nuk e voton këtë Paketë është i përjashtuar nga grupi parlamentar i PS”.
