Kongresi i UEFA, FFS: Hoqëm flamurin e Kosovës! FFK: Kosova u prezantua me simbolet shtetërore!
Pas deklaratave të Federatës së Futbollit të Serbisë, FFS, se ka hequr simbolet e shtetit të Kosovës në Kongresin e UEFA-s që u zhvillua në Beograd ka reaguar Federata e Futbollit të Kosovës, FFK, duke theksuar se FFK ishte pjesë e Kongresit të 49-të të UEFA-s, mbajtur në Beograd, ku delegacioni kosovar, i kryesuar nga presidenti Agim Ademi dhe u.d. Sekretari i Përgjithshëm, Markus Weidner, përfaqësoi Kosovën me dinjitet dhe në përputhje të plotë me statusin si anëtare e barabartë në UEFA dhe FIFA.
“Në këtë ngjarje të rëndësishme të futbollit evropian, ashtu si çdo federatë tjetër anëtare, Kosova u prezantua me simbolet e saj shtetërore, teksa konfirmoi edhe një herë përkushtimin e saj për zhvillimin e futbollit dhe forcimin e bashkëpunimit me institucionet ndërkombëtare.
Deklaratat e pabaza të Federatës së Futbollit të Serbisë, që synuan ta paraqesin pjesëmarrjen tonë si diçka jashtë interesit të futbollit, nuk kanë asnjë bazë dhe vetëm sa dëshmojnë tendencën e vazhdueshme të përzierjes së politikës në sport nga ana e Serbisë.
FFK-ja gjithmonë ka përfaqësuar interesat e futbollit të Kosovës dhe do të vazhdojë të punojë për zhvillimin dhe avancimin e lojës së futbollit, duke mbajtur marrëdhënie të shkëlqyera me institucionet ndërkombëtare. E kuptojmë se prania e delegacionit të Kosovës në kryeqytetin serb, si dhe fakti që flamuri i shtetit tonë valëviti përkrah atyre të shteteve të tjera, vazhdon të jetë i papranueshëm për politikën dhe një pjesë të opinionit në Serbi,” thuhet në njoftimin e FFK duke përfunduar:
“Megjithatë, shteti i Kosovës është një realitet i pakthyeshëm dhe sa më shpejt që ta pranojnë këtë, aq më shpejt do të kontribuojnë në normalizimin e marrëdhënieve sportive dhe shtetërore.”
Sipas këtij njoftimi, pretendimet për largimin e flamurit shtetëror të Kosovës gjatë punimeve të Kongresit, FFK thotë se Kosova ishte e përfaqësuar zyrtarisht me simbolet e saj shtetërore, njësoj si çdo anëtare tjetër e UEFA-s.
“Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi, ashtu siç është në familjen e futbollit evropian dhe botëror”.
“Sigurisht, si gjithmonë, persona të caktuar ndjekin agjenda kundër Kosovës dhe largojnë nga tavolina, madje edhe djegin flamurin e shtetit tonë, siç ndodhi mbrëmë në Beograd nga tifozë të klubeve serbe, por Kosova si shtet është dhe mbetet një realitet i pakthyeshëm. FFK-ja menjëherë do të paraqesë notë proteste në UEFA dhe institucionet tjera ndërkombëtare lidhur me këto veprime, që janë kundër vlerave që promovon UEFA”, thuhet në njoftimin e shtëpisë së futbollit të Kosovës.
Sipas FFK-së, Kosova u prezantua si e barabartë me të gjitha simbolet e saj dhe gjithçka ka shkuar sipas protokollit të UEFA-s deri në pjesën përfundimtare të punimeve.
Federata e Serbisë raporton se ka hequr simbolet e Kosovës
Federata e Futbollit të Serbisë ka reaguar sot duke thënë se ka hequr simbolet e Kosovës në Kongresin e 49-të të UEFA-s që po mbahet në Beograd.
Mediat serbe kanë raportuar se ky vendim i Federatë së Futbollit të Serbisë vjen pasi gjatë ditës së djeshme, janë publikuar foto e video nga Qendra e Kongresit “Sava” ku u zhvillua Kongresi i UEFA-s, e ku shihej kryetari i Federatës së Futbollit të Kosovës, Agim Ademi duke prekur flamurin e Kosovës. Videoja u bë virale në rrjetet sociale.
