Konjufca: Nuk po më duket e mundshme ta bëjmë vetë qeverinë!
Pas takimit me përfaqësuesit e partive politike, Kryetari i parlamentit të Kosovës, Glauk Konjufca, e pranoi se pa një koalicion është e pamundur të bëhet qeveria vetëm nga Lëvizja Vetëvendosje.
“Vetëvendosja e ka pas pozicionin transparent gjatë zgjedhjeve. Kemi thënë se qëllimi im ka qenë me vazhdu një qeverisje siç e kemi, mundësisht pa partitë tjera opozitare e pastaj e merr rezultatin e zgjedhjeve edhe e sheh që nuk e ke mbërri atë qëllim. Kjo është demokracia,” tha Glauk Konjufca ndërsa foli për Planin B:
“Kemi thënë qëllimi është ta bëjmë të vetëm qeverinë. A është e mundshme kjo? Mua nuk po më duket e mundshme.S’është mëkat kjo demokraci. E vendos një qëllim – nuk e kemi arritur. S’i kemi arritur qëllimet dhe tash jemi në skenarin B. Është rasti më normal i mundshëm. ”
Ndryshe, Kryetari i parlamentit të Kosovës, Glauk Konjufca, në mbledhjen me me përfaqësuesit e partive politike që e parashikon Rregullorja me rendin e ditës “Përgatitjet për Seancën konstituive të Kuvendit të Republikës së Kosovës”, caktoi ulëset e partive politike të prezantuar në Parlament si dhe u diskutua përmbajtja e mbledhjes e cila themelon legjislaturën e IX të Parlamentit të Kosovës në bazë të rezultateve të cilat i ka certifikuar KQZ.
Presidentja e Kosovës, Vjosa Osmani, dekretoi 15 prillin si datën për mbajtjen e seancës konstituive të përbërjes së re parlamentare, të dalë nga zgjedhjet e 9 shkurtit.
