Konjufca: Me dialog është pranuar që të flitet për të drejtat e Serbisë në Kosovë

Deputeti i Vetëvendosjes, shef i Grupit Parlamentar të kësaj partie, Glauk Konjufca, në debatin që Parlamenti i Kosovës zhvilloi për dialogun e Kosovës me Serbinë, tha se në vazhdimësi në këtë proces, delegacioni i Kosovës ka gabuar në shumë pika.

Ndër to e përmendi fusnotën, si njërën prej kompromiseve të dhimbshme të Kosovës në këtë proces.

Por njëri prej gabimeve më trashanike, sipas tij dhe Vetëvendosjes, është ajo e pranimit të Asociacionit të Komunave me Shumicë serbe.

“Marrëveshja e parë e parimeve për normalizimin e marrëdhënieve na ka sjell Zajednicën në Kosovë. Na ka sjell që në hapin e parë marrëveshjen më të dëmshme, të cilën e konstatoi si të tillë edhe Gjykata Kushtetuese”, tha Konjufca.

E për shkeljen kushtetuese në atë marrëveshje, Konjufca tha se nuk është ndëshkuar askush.

“Logjika juridike nuk është kështu. Për shembull policia kur e zë hajnin që ka vjedh para, edhe ia merr paratë edhe dënohet për veprimin që ka bërë. Kështu do duhej të ndodhte edhe në rastin e shkeljes së Kushtetutës me pranimin e Zajednicës. Nuk ka me shkel Kushtetutën edhe me thënë e na falni, se nuk do ta shkelim më dhe do ta krijojmë një Asociacion pa shkelje të Kushtetutës,” tha Konjufca duke shtuar se me këtë Asociacion, Serbia do krijimin e një autonomie territoriale.

“Këtë Vetëvendosja e ka paraparë para 13 viteve, dhe kemi shumë protesta, si përpjekje për ta parandaluar”, tha ai.

Kosova, tha Konjufca, ka pranuar që të flasë për të drejtat e Serbisë në Kosovë.

“Sepse nëse flasim për popullsinë serbe në Kosovë nuk ka asnjë shtet në Evropë që u garanton më shumë të drejta një pakice”, tha ai