Konjufca: Ne kemi bërë pesë kompromise të mëdha, tani është radha e LDK-së

Zyrtari i lartë i Lëvizjes Vetëvendosje, Glauk Konjufca, tha se negociatat me LDK-në kanë mbetur peng shkaku i kërkesës për Presidentin.

“Krejt negociatat kanë mbetur peng kur kemi ardhur tek çështja e presidentit të cilin e ka hapur LDK-ja, e jo ne. Është gabim qysh po e shoh tendencën që me pozicionuar në përgjegjësi të barabartë në këtë që nuk po arrihet si marrëveshje. Vetëvendosje e ka krejtësisht jashtë postin  e presidentit,’’ tha ai.

‘’Lëvizja Vetëvendosje nuk e kërkon presidentin, merreni fjalën si të mirëqenë, as kryeministrin, e kemi fituar me meritë. Jemi pajtuar me vendos me kritere. Ajo që ka qenë para zgjedhjeve, ka qenë para zgjedhjeve,’’ tha Konjufca duke saktësuar:

‘’Ka një ngecje në një pikë specifike, për shembull imagjinoni një situatë pozicionin e presidentit jashtë kornizës së marrëveshjes, Për 60 sekonda bëhet marrëveshja. Këtu kemi ngecur.’’

Glauk Konjufca ka renditur kompromiset që, sipas tij, janë bërë me LDK-në, e që thotë se duhet vlerësuar nga kjo parti.

‘’Shtatë takime për vijat e trasha dhe pastaj ky takimi vetëm ata dy dhe aty ka ndodh kompromisi i parë i VV që Albini ia ka ofruar LDK-së zgjedhjen e parë. Kompromisi i dytë ndarja e barabartë e ministrive i cili duhet të vlerësohet. Në Gjermani i kanë të ndara 9 me 6. Kompromisi i tretë ka qenë që zëvendës kryeministri i parë i takon LDK, i katërt që ta negociojmë edhe kryeparlamentarin, e që sipas Kushtetutës i takon fituesit të zgjedhjeve, i pesti gjenoriziteti sa i përket programit të VV-së, akomodimi i programit te LDK-së. Këto kompromise nuk kanë qenë të vogla.’’