Konstatimet e AmCham/ Investimet e huaja, Basha: Korrupsioni po i vjedh të ardhmen vendit!

Duke i vlerësuar realiste konstatimet e Dhomës Amerikane të Tregtisë për investimet e huaja në Shqipëri, Kryetari i Partisë Demokratike, Lulzim Basha, u shprehë se korrupsioni në nivelet më të larta në mënyrë të pafalshme po i vjedh të ardhmen vendit tonë.

“Dhoma Amerikane e Tregtisë ka konstatuar (pa asnjë surprizë) se korrupsioni është problemi kryesor që e lë pas Shqipërinë në fushën e investimeve të huaja. Është korrupsioni në nivelet më të larta që në mënyrë të pafalshme po i vjedh të ardhmen vendit tonë,” thekson Lulzim Basha në reagimin e tij përmes rrjetit social Twitter duke bërë përgjegjëse qeverinë për pasojat e rënda të korrupsionit:

“I njëjti institucion i respektuar vlerësoi po sot potencialin e jashtëzakonshëm të Shqipërisë për të thithur investime. Por ky potencial për zhvillim po shkatërrohet nga një qeveri që në gjenezën e saj ka kapjen e shtetit dhe korrupsionin.”

Ndryshe, pjesën më të madhe të investimeve të huaja në rajon i merr Serbia dhe Maqedonia e Veriut, dhe për të gjitha këto arsye, Dhoma Amerikane e Tregtisë mendon se Shqipëria ka nevojë për një reformë të thellë në klimën e investimeve, në mënyrë që të jemi më konkurent sesa jemi sot. Arsyeja më e fortë për të bërë këtë nuk është renditja globale, por përmbushja e potencialit që Shqipëria ka për të qënë lider në rajon sa i përket invetimeve të huaja.