Konstituimi i Parlamentit të Kosovës, sot vazhdon seanca

Pas aktgjykimit të Gjykatës Kushtetuese ku përcaktohen rregulla të reja për konstituimin e Parlamentit të Kosovës, sot në orën 11:00 pritet të fillojë vazhdimi i seancës.

Në seancë sot pritet të mblidhen 120 deputetët e legjislaturës së 9-të, për të vijuar procesin e zgjedhjes së Kryetarit të Parlamentit dhe Nënkryetarëve.

Pas publikimit të aktgjykimit, afati 30-ditor për përfundimin e konstituimit ka nisur zyrtarisht, duke e vënë Parlamentin dhe subjektet politike përballë një presioni institucional dhe kushtetues për të siguruar funksionalitetin e plotë të institucionit.

Ndërkohë, Presidentja e Kosovës, Vjosa Osmani, ka vlerësuar se konstituimi i Parlamentit është një urgjencë shtetërore, duke theksuar rëndësinë e krijimit të institucioneve të reja në këtë periudhë sfidash globale dhe zhvillimesh të ndjeshme rajonale.

Zvarritja e procesit, sipas Presidentes Osmani, deri më tani ka dëmtuar jo vetëm besueshmërinë e institucioneve dhe zhvillimin e brendshëm, por edhe pozicionin ndërkombëtar të Kosovës.

Ndryshe, sipas aktgjykimit të Gjykatës Kushtetuese, Kuvendi duhet të zgjedhë kryetarin e tij përmes votimit të hapur, brenda 30 ditësh, me jo më shumë se tri raunde votimi për të njëjtin kandidat.