Konsultimet për datën e zgjedhjeve, liderët politikë nuk respektojnë Presidenten e Kosovës

Edhe në ditën e dytë të zgjedhjeve u konfirmua se janë vetë liderët politik ata që krijuan krizën institucionale dhe mungesa e Hashim Thaçit i bënë ata që të tregojnë se ishte frika dhe jo respekti, sepse thjeshtë ata nuk respektojnë institucionet e shtetit të Kosovës edhe kur ftohen nga Presidenti.

Në ditën e parë, dje, vetëm kryetari i Lëvizjes Vetëvendosje iu përgjigj ftesës së U.D.Presidentes së Kosovës, Vjosa Osmani, për konsultime lidhur me zgjedhjet e reja parlamentare duke konfirmuar se vetëm kjo parti nuk ishte dhe nuk është nën kontrollin e Thaçit ndërsa liderët e partive tjera dërguan përfaqësuesit e tyre ndonëse axhenda e tyre ishte bosh.

Edhe sot u përsërit kjo pamje e shëmtuar! Vetëm lideri i Listës Srpska u paraqit në konsultime me Vjosa Osmanin duke dëshmuar se nuk kanë lidhje dhe nuk marrin urdhra nga Hashim Thaçi, dhe në sy të botës kishin rastin të përçojnë mesazhin se janë institucional; Rast të cilin ua dhanë liderët shqiptarë, analfabetë funksional të politikës në Kosovë!

Endrit Shala nga Nisma Socialdemokrate në takim me Presidenten e Kosovës u përfaqësua nga Endrit Shala i cili pas takimit u shpreh se kishte kërkuar se zgjedhjeve të miratohet buxheti i Kosovës për vitin 2021, në mënyrë që mos të ketë bllokadë institucionale ndërsa fillimi i muajit shkurt do të ishte ideale për mbajtjen e zgjedhjeve të përgjithshme.

“Biseduam në lidhje me dakordimin me të gjitha subjektet politike për datën e zgjedhjeve. Kërkuam nga u.d e presidentes që kurdo të caktohet data e zgjedhjes me qëllim që mos ta bllokojmë vendin të gjitha subjektet politike që janë të përfaqësuara në Kuvendin e Kosovës, të dakordohemi që sa më shpejt të thirret një seancë dhe ta votojmë buxhetin e Kosovës për vitin 2021, që pastaj çfarë do situate tjetër që do ballafaqohemi mos të jemi para një bllokimi institucionalë në vitin 2021. Fillimi i shkurtit do të ishte data ideale për mbajtjen e zgjedhjeve të përgjithshme,” tha Endrit Shala duke u shprehur shart se Nisma Socialdemokrate nuk ka vija të kuqe për asnjë parti politike dhe siç tha ai pas caktimit të datës për zgjedhjet do të vendosin nëse do të bëjnë ndonjë koalicion parazgjedhor me ndonjë parti politike.

Në takim me ushtruesen e detyrës së presidentit, Vjosa Osmani, përfaqësuesi i AKR-së ishte Jetlir Zymberaj. Ai tha se për AKR-n, afati optimal për mbajtjen e zgjedhjeve të reja është fundi i janarit ose fillimi i shkurtit.

“Ne u pajtuam bashkërisht që data e zgjedhjeve të caktohet në një datë sa më shpejt të mundshme, në mënyrë që edhe krizat e mundshme kushtetuese të evitohen. Kemi parasysh që nevojitet goxha kohë që pas përfundimit të zgjedhjet të arrihet deri tek certifikimi i rezultateve,” tha Zymberaj duke shprehur gatishmërinë e partisë që përfaqëson për krijimin e një koalicioni parazgjedhor me tri prej partive të mëdha politike në vend.

“Jemi në diskutime brenda partiake, opsioni më i mundshëm është krijimi i një koalicioni me një subjekt tjetër politik…Besoj që do të jetë me njërën nga partitë e mëdha.”

Ndërkohë Fikrim Damka nga Grupi 6+ pas takimit me ushtruesen e detyrës së Presidentit të Kosovës, Vjosa Osmani tha se në këtë takim janë shprehur se janë të gatshëm që të garojnë në zgjedhje kurdo që mbahen ato.

“Pas vendimi të Gjykatës Kushtetuese janë krijuar rrethana të reja në Kosovë. Ne u pajtuam që jemi gati për zgjedhjet e reja dhe të punojmë për të mirën e vendit,” tha Fikrim Damka duke përfunduar:

“Si kimunitete joshumicë i kemi vendet e garantuara veç e veç dhe nuk mund të garojmë në koalicion me asnjë parti tjetër.”

Ushtruesja e detyrës së presidentit, Vjosa Osmani ka pritur në takim edhe përfaqësuesit e Listës Srpska, për t’u konsultuar rreth përcaktimit të zgjedhjeve të reja pas vendimit të Kushtetueses.

Pas takimit, përfaqësuesit e Listës Srpska nuk u prononcuan për media rreth konsultimeve me U.D.Presidenten e Kosovës, Vjosa Osmani.

Ndryshe, konsultimet e Presidentes së Kosovës, Vjosa Osmani me përfaqësuesit e partive politike, u zhvilluan pas vendimit të Gjykatës Kushtetuese, e cila Qeverinë Hoti e shpalli të paligjshme ndërsa i dha afat prej 40 ditësh Presidentes që të shpall zgjedhjet e reja parlamentare.