Kontakt me një të dyshuar me COVID-19, Albin Kurti në vetizolim

Kryeministri në detyrë i Kosovës, Albin Kurti prej sot është në vetizolim pasi një zyrtar i Ministrisë së Integrimeve Evropiane ka pasur kontakt me një nga personat që ka dalë pozitiv në testin për COVID-19, person me të cilin Kurti kishte kontakt.

Kryeministri Kurti ka sqaruar përmes rrjetit social Facebook se do qëndroj në vetizolim të dalin rezultatet e testimit për zyrtarin e Ministrisë së Integrimeve Evropiane me të cilin Albin Kurti kishte kontakt ndonëse gjithnjë duke respektuar rregullat për distancën fizike.

“Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalë pozitiv në testin për COVID-19. Janë marrë mostrat dhe po presim rezultatin,” tha Kryeministri Kurti duke përfunduar:

“Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.”