Kontestimi i ligjeve në Kushtetuese, Kurti: Përpjekje për paralizim reformash!

Kryeministri i Kosovës, Albin Kurti, tha se kontestimi i ligjeve në Gjykatën Kushtetuese, nuk është rastësi por përpjekje për paralizim reformash në vend.

“Sot para nesh kemi një mbledhje mbase më të shkurtër se sa zakonisht, por me një pikë të rëndësishme në rendin e ditës. Po e themelojmë strukturën për hartimin e Strategjisë Kundër Korrupsionit,” tha Kurti në mbledhjen e sotme të qeverisë duke shtuar se gjatë këtyre dy viteve të qeverisjes kanë dëshmuar bindshëm dhe në vazhdimësi vullnetin për të luftuar krimit dhe korrupsionin, si dhe për reforma në drejtësi e në administratën publike.

“Edhe përmes veprimeve tona të përditshme, edhe përmes  vlerësimeve vjetore të raporteve ndërkombëtare sikurse ai i indeksit të të Transparency International ose i Raportit të Bashkimit Evropian për vendin. Krahas vullnetit dhe guximit për të zbatuar ligjet në fuqi, kemi miratuar këtu edhe ligje të tjera, që do të jetësonin reformat e programit tonë qeverisës dhe ndryshimet për të cilat qytetarët tanë votuan masivisht dy vite më parë,” tha Albin Kurti duke sqaruar se bëhet fjalë për Ligjin për Këshillin Prokurorial parashikon reformën në sistemin e drejtësisë; Ligjin për Zyrtarët Publikë, që parashikon reformën në administratën publike; Dhe, Ligjin për Byronë për Konfiskimin e Pasurisë së Pajustifikueshme, që parashikon luftimin e korrupsionit dhe padrejtësive.

“Megjithatë, jo për rastësi, të tre këto ligje, bashkë me Ligjin për masat e përkohshme mbrojtëse të furnizimit me produkte themelore për qytetarë, nëpërmjet të cilit bëhej parandalimi i abuzimit me rritjen e çmimeve të produkteve bazë, janë dërguar në Gjykatën Kushtetuese nga opozita parlamentare. Madje, Ligji për Këshillin Prokurorial ka më shumë se gjashtë muaj që është në trajtim. Në historinë 15-vjeçare të shtetit të pavarur të Kosovës nuk mbahet mend, që kaq shumë ligje të jenë kontestuar në Gjykatën Kushtetuese brenda një kohë kaq të shkurtër. Kontestimi i tyre është përpjekje dëshpëruese për paralizim të reformave. Njëkohësisht është kundërshtim i hapur i nevojës shoqërore, i kërkesës qytetare dhe i vullnetit demokratik të 14 shkurtit 2021,” tha Kryeministri i Kosovës, Albin Kurti, dhe pavarësisht kësaj, përkushtimi tha ai mbetet po i njëjti.

“Zelli vetëm edhe më i madh. Ecja jonë nuk do të ndalet. Sot, po e bëjmë hapin e radhës, me Strategjinë kundër Korrupsionit, të cilën jam i bindur që me shumë kënaqësi do ta votojmë në këtë mbledhje gjithsecili prej nesh.”