Kontrata e vërtetë me qytetarët/ Basha në Fier, më 16 Shkurt fillon një ditë e re
Kryetari i PD Lulzim Basha në kuadër të turit të takimeve me qytetarët, mesazhin kryesor për fierakët e kishte për protestën e madhe të 16 Shkurtit, të një dite të re, kontrate të vërtetë mes qytetareve dhe qeverisjes përmes zgjedhjeve të reja, të lira dhe të ndershme.
“Dëshpërimi, humbja e shpresës, dyshimi, mosbesimi janë armët e fundit të kësaj bande në pushtet, ndaj ju ftoj më 16 shkurt t’ja hedhim në Lanë këto armë që të gjithë së bashku të rindezim motorët e ekonomisë, miërqenës përmes lirive, mundësive, punësimit që do t’i bëjmë realitet përmes planit tonë ekonomik,” tha Lulzim Basha duke shtuar:
“Në 16 Shkurt do ti japim Shqipërisë dhe Evropës mesazhin se do të fillojë një dite të re, një ndryshim, i cili ka në themel vlerat evropiane, kontratën e vërtetë mes qytetarëve dhe qeverisjes përmes zgjedhjeve të reja, të lira dhe të ndershme.”
Me këtë rast kryetari i Partisë Demokratike theksoi dhe cili është prioriteti i PD:
“Një qeveri që ka një plan ekonomik për të hapur vende pune, vende pune me paga dinjitoze, me kushte dinjitoze. Ky është prioriteti i PD, ky është prioriteti i grupit tonë parlamentar, ky është prioriteti ynë. Kjo është plotësisht mundur. Kushdo që thotë të kundërtën gënjen dhe i fryn burive të dëshpërimit për hesap të Edi Ramës.”
Nga Fieri, kryetari i Partisë Demokratike, Lulzim Basha foli edhe për protestën e studentëve dhe pedagogëve ndërsa kishte një mesazh për kryeministrin Edi Rama.
“Asnjë shans nuk ka Edi Rama t’ju djegë vitin akademik studentëve, ai do njihet i plotë bashkë me mirënjohjen e thellë të qytetarëve shqiptarë për rolin e tyre në këtë zgjim të madh kombëtar që ka dhe do të ketë vetëm një përfundim, çlirimin e Shqipërisë nga oligarkia, çlirimin e Shqipërisë nga krimi”. Ndryshe, gjatë këtij takimi madhështor, lider i opozitës, Lulzim Basha ishte i shoqëruar nga deputetët e Partisë Demokratike, Enkelejd Alibeaj dhe Luan Baçi, i cili është dhe kryetar i PD në Fier.
