Kontrolli mbi territorin, gjobat arritën 2.5 milionë euro, 487 objekte të prishura

Në gjithë vendin përgjatë vitit të shkuar u prishën 487 objekte ku 31 për qind e tyre ishin për efekt të projekteve infrastrukturore të zbatuara nga qeveria.

Raporti i Inspektoratit Kombëtar të Mbrojtjes së Territorit vlerëson se një pjesë tjetër janë prishur si të kundraligjshëm.

“Referuar analizës vjetore të saj, janë realizuar gjithsej 6148 inspektime në territor. Janë prishur gjithsej 487 ndërtime/objekte, prej të cilave: 171 prishje të objekteve të kundërligjshme, 152 prishje të objekteve në kuadër të projekteve të rëndësishme infrastrukturore të qeverisë, si dhe 164 objekte të dëmtuara nga tërmeti i vitit të kaluar.

Gjithashtu, janë trajtuar praktika shkresore, gjithsej 3731 ankesa/shkresa/platforma për bashkëqeverisjen” thuhet në raportimin e bëra nga ky Inspektorat për llogari të atij qendror.

Një pjesë të mirë të prishjes së objekteve e kanë zënë edhe ato që janë lidhur me procesin e rindërtimit ku qeverisë i është dashur të ndërhyrje për krijimin e kushteve të nevojshme të infrastrukturës. Raporti tregon se gjatë vitit 2020, janë shembur gjithsej 164 objekte në Bashkitë: Tiranë, Vorë, Durrës, Shijak, Krujë, Kamëz, Kurbin.

I njëjti dokument nënvizon se për periudhën Janar – Dhjetor 2020, ka marrë gjithsej 428 vendime, nga të cilat: 208 vendime për “Prishje objekti të kundërligjshëm” dhe “Pezullimin e punimeve në ndërtim”; 128 vendime për “Dënim me gjobë”, të vëna në fushën e ndërtimeve pa leje; 10 vendime për “Dënim me gjobë” të vëna mbi zbatimin e ligjshmërisë tek produktet e ndërtimit/burimet ujore; 11 vendime për “Dënim me gjobë”, të vëna ndaj kryeinspektorëve/inspektorëve pranë IMT-ve të bashkive për veprime/mosveprime nga ana e tyre, si dhe 71 vendime për “Dënim me gjobë”, të vëna në fushën e mjedisit, ujërave dhe pyjeve.

Në rastet e shkeljeve nga ana e autoriteteve janë aplikuar gjoba të cilat kanë kapur një vlerë të konsiderueshme.  Kështu sipas raportit vlera e gjobave dhe e kamatëvonesave është 311,585,000 lekë (rreth 2.5 milionë euro) , ku janë arkëtuar 600.000 mijë lekë dhe shfuqizuar 6 gjoba me vlerë 4,480,000 lekë.

Ky inspektorat ka në përgjegjësi edhe krimet mjedisore dhe në vitin e shkuar janë vendosur gjoba të vendosura për kundërvajtjet e konstatuara në brigjet ujore të vendit (lumenj, dete, liqene, laguna). Në total janë gjobitur 92 subjekte për kryerjen e aktivitetit të paligjshëm në dëm të mjedisit ku janë vendosur 88.2 milion lekë gjoba./Monitor/