Koronavirusi, Edi Rama: Duhet të përballemi dhe me fatkeqësinë e madhe…

Nga Këshilli i Ministrave, aty ku ka mbledhur kokat më të mençura të kombit të cilat arritën për tetë vjetë ta shkatërrojnë aq shumë këtë vend sa për 80 vjet nuk do ta marrë veten, Kryeministri Edi Rama, tha se kanë marrë masa për koronavirusin por si në çdo vështirësi a fatkeqësi natyrore ose emergjencë shëndetësore që shfaqet, tha ai, duhet të përballet dhe me fatkeqësinë e tij të të madhe të kanaleve e portaleve ku lulëzon injoranca, ligësia, dembelizmi e grykësia e maskarallëkut.

“Koronavirusi nuk luftohet me politikë, as me gjithollogji dhe aq më pak me frikë dhe lëre pastaj me panik!Ne kemi qysh momentin e parë të shfaqjes së tij që përgatitemi, në bashkëpunim të ngushtë me Organizatën Botërore të Shëndetësisë.Kemi bërë e po bëjmë çdo gjë sipas planit,” tha Edi Rama në reagimin e tij përmes rrjetit social Twitter duke akuzuar mediat: 

“Fatkeqësisht ky vend në çdo vështirësi a fatkeqësi natyrore ose emergjencë shëndetësore që shfaqet, duhet të përballet dhe me fatkeqësinë e tij të të madhe të kanaleve e portaleve ku lulëzon injoranca,ligësia,dembelizmi e grykësia e maskarallëkut që në këto raste bëhet çnjerëzor.” 

Në fund, përveç opinionbërësve, kryeministri Edi Rama, identifikoi edhe politikanët e së keqes:

“Dhe në krye të të tërë delenxhinjve e parazitëve që lëshohen mbi publikun në nevojë për informacion, kanë dalë përsëri, si gjithnjë, politikanët e së keqes që duan kaos, rrëmujë, dëshpërim, në përpjekjen e dëshpëruar për të kthyer të shkuarën që i ka marrë me vete përgjithnjë!”

Ndryshe, koronavirusi si problem global nuk varet nga Edi Rama nëse do të vijë në Shqipëri ose jo, por as nga televizionet dhe portalet që ai sot i akuzon ndonëse ka të drejtë kur thotë aty se lulëzon injoranca, ligësia, dembelizmi e grykësia e maskarallëkut, sepse ishin pikërisht këto media të cilat e sollën dhe e mbajtën në pushtet që nga viti 1998.