Koronavirusi, futet në karantinë sulmuesi i Kombëtares Shqiptare

Pas rasteve të reja të infektimit nga Koronavirusi të dala në skenë gjatë orëve të fundit mes lojtarëve të US Pianezes, sot klubi i Juventusit ka komunikuar pezullimin e përkohshëm të aktiviteteve të formacionit U-23.

Masa e marrë është vendosur në bazë të udhëzimeve dhe në pritje të komunikimeve zyrtare nga ana e autoriteteve të shëndetësisë të Alesandrisë, me të cilin personeli shëndetësor i Juventusit është në kontakt të vazhdueshëm. 

Specifikohet që lojtarët e Juves nuk kanë shfaqur simptoma, por kjo është masë paraprake sigurie. Pjesë e skuadrës që ka përfunduar në karantinë është edhe Xhakomo Vrioni, sulmuesi 21-vjeçar i Kombëtares shqiptare që u transferua te bardhezinjtë gjatë merkatos dimërore.

Ndryshe, bardhezinjtë u përballën me skuadrën e US Pianezes më 23 shkurt./Panorama/