Koronavirusi/ Karantinë në Zogaj të Ulqinit, LDMZ: Mos provokoni!
Pas propozimit të Qeverisë së Malit të Zi, për mundësinë e shfrytëzimit të kazermës në Zogaj, Komuna e Ulqinit, si karantinë me qëllim të trajtimit të të sëmuarëve eventual të prekur nga Koronavirusi, ka reaguar ashpër Lidhja Demokratike në Mal të Zi duke theksuar se Ulqini si qytet me potencial të lartë turistik dhe zonë e njohur me prodhimet bujqësore, janë të vetmet burime materiale të kësaj popullate.
“Të gjithë qytetarët e Ulqinit dhe opinion i gjerë, sidomos ai shqiptarë në Mal të Zi, me të dretjë, janë thellë të indinjuar, nga ideja, e jo më nga fakti, se Qeveria e Malit të Zi, sipas kumtesës së Ministrisë së shëndetësisë, në mënyrë eksplicite veçon, kazermën në Zogaj, si mundësi për të shërbyer si karantinë, për trajtimin e të sëmuarëve nga ky virus shkatrrimtarë për qëniet njerëzore,” thekson në reagimin e saj Lidhja Demokratike në Mal të Zi, për më shumë, kur dihet se ky virus, përkatësisht kjo sëmundje, është lehtë e transmetueshme.
“Lidhja Demokratike në Mal të Zi nuk është kundër marrjes së masave preventive për parandalimin e përhapjes së virusit Korona, por në mënyrë kategorike jemi kundër këtij propozimi, nga fakti se Ulqini si qytet me potencial të lartë turistik dhe zonë e njohur me prodhimet bujqësore, pasi janë të vetmet burime materiale të kësaj popullate, nuk është zgjidhja më e mirë. Ulqini dhe qytetarët e tij, përveç rrezikut të bartjes së sëmundjes në këtë zonë, do të përballet edhe më dëme të drejtëpërdrejta dhe të paparashikueshme ekonomike, në dëmitmin e imazhit të një qyteti turistik, e cila do të ndikonte në rënien e ofertës turistike dhe jo vetëm.”
Në fund, duke u shprehur të sigurtë se Mali i Zi ka kapacitete dhe hapësira të mjaftueshme, në mënyrë që rrezikshmëria e përhapjes së sëmundjes të parandalohet duke anashkaluar një komunë me specifika të veçanta siç është Ulqini, Lidhja Demokratike i bënë thirrje Ministrisë së Shëndetësisë së Malit Zi :
“Të merret seriozisht me problemin në fjalë e të mos provokojë situata me impakt negativ dhe prapavi politike ndaj popullatës me shumicë shqiptare në komunën e Ulqinit.”
