Koronavirusi në botë/ Në Kinë bie numri. Mbi 9.000 të prekur në Itali, i infektuari i parë po shërohet…

Të dhënat e mëngjesit të sotëm flasin se në Kinë në 24 orët e fundit janë shënuar vetëm 19 raste të reja të prekur me koronavirus, që është dhe numri më i ulët që nga paraqitja e tij. Gjithashtu në Korenë e Jugut është shënuar numri më u ulët me 35 raste të reja në ditë.

Në Itali, sipas të dhënave të orës 8:30, janë infektuar 9.182 persona ndërsa kanë vdekur 466. Ndërkohë gjendja e personit të parë të prekur me koronavirus po përmirësohet dhe është hequr nga intubimi.

Kroçera “Grand Princess” me 2.400 udhëtarë dhe 1.000 anëtarë të ekuipazhit janë ankoruar në portin e Kalifornisë. Në këtë anije 21 persona kanë rezultuar pozitiv në koronavirus. Udhëtarët do të izolohen në një bazë ushtarake të afërt, ndërsa anëtarët e ekuipazhit të cilët nuk kanë nevojë për ndihmë mjekësore do të qëndrojnë në anije.

Në Slloveni janë prekur 25 persona dhe zyrtarisht bëhet e ditur se njëri prej tyre është njëri ndër njerëzit kryesor të Qendrës Klinike Universitare në Lublanë. Në Slloveni tashmë ndalohet tubimi i më shumë se 500 njerëzve dhe të gjitha eventet sportive do të zhvillohen pa publik. Masat tjera përfshijnë matjen e temperaturës së të gjithë udhëtarëve që vijnë nga jashtë shtetit në Aeroportin e Lublanës.

Në Kroaci dje u konfirmua rasti i 13-të i prekur me koronavirus ndërsa janë 4.737 persona nën mbikëqyrje.  Duke filluar nga e hëna e 9 Marsit në fuqi janë masat e reja për parandalimin e përhapjes së koronavirusit, meqë kryesisht kanë të bëjnë për personat që vijnë nga jashtë dhe kanë të bëjnë me zonat e prekura, duhet të jenë në vetëizolim, ndërsa shoferët e kamionit që udhëtojnë drejt Italisë duhet të qëndrojnë në shtëpi në vetëizolim e kur udhëtojë drejt Italisë duhet të kenë pajisje të veçanta mbrojtëse duke iu përmbajtur rekomandimeve të rrepta higjienike.  

Ndërkohë Banka e Investimeve Morgan Stanley ka tërhequr vërejtjen se ekonomia globale do të futet në recesion nëse epidemia Covid-19 vazhdon edhe në tremujorin e tretë të vitit 2020. Në shkresën drejtuar investitorëve, Banka thekson se të dhënat tregojnë që në vitin 2020 GDP botërore do të bie për rreth 2.5%. Përveç kësaj, Morgan Stanley parashikon që SHBA, BE dhe Japonia do të futen në recesion teknik nëse epidemia zgjatë edhe gjashtë muaj. Këto parashikime vijnë pasi investitorët kanë nxituar që kapitalin e tyre ta investojnë në aksione amerikane dhe ari ndërsa bursat në gjithë botën kanë pësuar rënie së bashku me çmimin e naftës