Koronavirusi në Shqipëri, Rama: Receta më e gabuar buron nga paniku, shkollat mbyllen për 2 javë…

Pas konfirmimit zyrtar nga Ministria e Shëndetësisë të dy rasteve të para me koronavirus në Shqipëri, pacientet  babë e bir që udhëtuan nga Firence përmes Hanit të Hotit, Qeveria shqiptare ka zhvilluar një mbledhje të jashtëzakonshme për forcimin e planit të masave për shkak të koronavirusit.

Mbledhja ka nisur me fjalen e Kryeministrit Edi Rama në orën 09:00, ku fillimisht ka folur për lëvizjet e para pas shfaqjes së rastit të parë të koronavirusit, sipas protokollit të Organizatës Botërore të Shëndetësisë.

“Këshilla themelore e OBSH dhe baza e të gjitha praktikave të ndjekura nga shtetet e tjera është: ruajtja e qetësisë, marrja e masave hap pas hapi dhe referimi sa më strikt në protokollin zyrtar të organizatës botërore të shëndetësisë, si edhe në burimet zyrtare të informimit shëndetësor,” tha Edi Rama duke shtuar se sistemi ynë shëndetësor dhe të gjitha strukturat e përfshira në planin e masave janë në gatishmëri për të përballur situatën hap pas hapi.

Kryeministri tha se receta më e gabuar në raste të tilla është ajo që buron nga paniku, ndërkohë që ilaçi më efektiv është qetësia dhe zbatimi i gjithë rregullave të thjeshta por shumë efikase edhe sipas njoftimeve të vazhdueshme të OBSH.

“Masat e sotme, gjithnjë në ndjekje të protokollit të përcaktuar janë pezullimi i fluturimeve direkte nga Veriu i Italisë dhe me të gjitha zonat e kuqe deri në datën 3 prill, mbyllja e institucioneve arsimore për 2 javë për të ndaluar përhapjen e pastaj vlerësimi më tej.

Të mbyllim të githa institucinet arsimore dhe të mbyllim të gjitha grumbillimet masive kulturore arsimore dëgjesave publike deri më datën 3 prill,  për të parë dinamikën e këtij zhvillimi e për të vendosur për më tutje,” tha Edi Rama duke bërë apel për kujdes për vizitat nëpër spital, që të shmangen sa më shumë për të afërmit e shtruar aty.

“Do ju lutesha shumë atyre që kanë të afërm në spital në QSUT të kufizojnë maksimalisht vizitat de të lehtësojnë punën e gjithë personelit por edhe të tonën e përbashkët. Spitalet dhe ekipet që do trajtojnë rastet e konfirmuara janë të përcaktuar dhe dihen saktësisht nga gjithë personat e përfshirë në këtë proces.”

Me këtë rast Edi Rama foli edhe për mbylljen e kufijve:

“Në gjithë vendet ku ka prevaluar qetësia dhe vetëpërmbajtja dhe administrimi i këtij fenomeni kërcënues është më i mirë. OBSH kundërshton me forcë mbylljen e kufijve. E them këtë se në mënyrë të vazhdueshme është predikuar nga burime të pacertifikuara që nuk kanë asnjë kompetencë për këshilltarin apo sugjeruesin se duheshin dhe duhen mbyllur kufijtë dhe sic tregojnë eksperiencat e vendeve mbyllja e kufijve është një masë shumë drastike e përdoruar pothuajse fare apo pjesërisht në raste shumë specifike të lidhur me të dhëna shumë specifike që vendi sot nuk i ka,” tha Kryeministri Edi Rama ndërsa kishte një mesazh edhe për mediat por jo me gjuhën e tij të zakonshme:

“Thirrje për të gjithë mediat, është në këto momente një përgjegjësi e jashtëzakonshme për shëndetin e njerëzve dhe mbarëvajtjen e procesit jo të lehtë përballjeje që mediat të vetëpërmbahen dhe të kenë vetëdijen se në këtë situatë armiku më kërcënues nuk është koronavirusi por është paniku”.

Ndryshe, Shqipëria është përfshirë në hartën e vendeve të prekura nga koronavirusi. Dje pas mesnate Ministria e Shëndetësisë konfirmoi dy rastet e para. Dy të prekurit janë babë e bir, të ardhur nga Firence.