Koronavirusi nuk hyri nga Hani Hotit, Dogana përgënjeshtron Ministrinë e Shëndetësisë
Dogana e Hanit të Hotit ka hedhur poshtë pretendimet e Ministrisë së Shëndetësisë se shtetasi 28 vjeçar, i cili është identifikuar tashmë si i infektuar me koronavirus, ka hyrë në vendin tonë nga kjo pikë doganore.
“Dogana e Hanit te Hotit deri më tani rrëzon deklaratën e Ministrisë se Shëndetësisë. Shtetasi 28 vjeçar, për të cilin ministria ka dhënë emrin nuk rezulton se ka kaluar në doganën e Hanit të Hotit por atë të Muriqanit. Po ashtu babai i tij nuk rezulton i regjistruar as në Muriqan as në Hanin e Hotit,” thekson Dogana nga ky vendkalim duke saktësuar:
“Efektivët e shërbimit në pikën e Hanit te Hotit prej 4 orësh kanë kontrolluar sistemin por nuk rezulton. Madje sistemi është kontrolluar që nga data 19 shkurt dhe nuk ka asnjë person me atë emër. Shtetasi P.K, 28 vjeç rezulton që ka hyrë drejt Shqipërisë nga Muriqani ndërsa babai nuk rezulton i regjistruar në asnjë prej doganave. 28 vjeçari është larguar nga Shqipëria në janar dhe është rikthyer në 26 shkurt,” thekson Dogana e Hanit të Hotit.
