Koronavirusi/ Plani me 7 pika për ekonominë, Rama: 25 mln $ për shëndetësinë, 100 mln $ për kompanitë…

By Pa frike Last updated Mar 19, 2020 502

Kryeministri Edi Rama ka prezantuar mbrëmjen e sotme Planin për ekonominë prej 7 Pikave, në kohën kur vendi është prekur nga virusi vdekjeprurës COVID-19 që ka detyruar qeverinë të marrë masa drastike.

Foli për fondet për Ministrinë e Shëndetësisë, kompanitë, Ministrinë e Mbrojtjes etj. ende nuk ka kaluar as gjysmë muaji që janë mbyllur bizneset dhe ai flet për të ardhura në pikiatë ndërsa si gjest të mirë përdori vendimi për përgjysmimin e pagave të ministrave dhe deputetëve deri sa të përfundojë kjo situatë, ndërkohë që vlerësoi angazhimin e Presidentit të Republikës Ilir Meta, thuajse problemi i shqiptarëve janë të ardhurat e tyre.

“Unë në fakt doja që qysh në planin A, të impononim heqjen e diçkaje nga vetja për të gjitha ata që sot fitojnë më shumë si biznes i madh apo kanë një pagë të lartë në sektorin publik por më bindën se ky mund të perceptohej gabimisht si një mesazh i gabuar dhe të hynte pastaj në ato gojët pa perimetër të ekraneve të mbrëmjes nga ku do dilte si arsye se shteti nuk ka para për të paguar rrogat e pensionet, prandaj nuk do prekim hë për hë asnjë pagë tjetër përveç pagave të anëtarëve të Këshillit të Ministrave dhe deputetëve të Kuvendit të Shqipërisë, të cilët do marrin gjysmën e rrogës deri në mbarimin e luftës. Nuk duam të krijojmë asnjë keqkuptim duke përgjysmuar pagën e Presidentit të Republikës të cilit, haka e do që t’i bëj një falënderim publik për faktin se qysh se kemi hyrë në këtë luftë po ndihmon si mundet dhe sa mundet apo pagat e drejtuesve të lartë të institucioneve të pavarura. Në këtë fazë është në dorën e tyre ta bëjnë këtë gjë ose jo.

Plani ynë për adresimin e nevojave për financim të atyre që janë prekur drejtpërdrejt në ekonominë e tyre të përmuajshme ka këto 7 pika:

– Së pari, 2.5 mld lekë ose 25 mln dollarë për luftën në vijën e zjarrit që vihet në dispozicion të Ministrisë së Shëndetësisë për pajisje dhe materiale mjekësore apo mbështetje të të gjithë personelit të angazhuar mjekësor;

– Së dyti,10 mld lekë ose 100 mln dollarë përmes instrumentit të një garancie sovrane për kompanitë që kanë vështirësi objektive për të paguar pagat e punonjësve të tyre;

– Së treti, 6.5 mld lekë ose 65 mln dollarë për nevojat më imediate për shtresat më në nevojë, për biznesin e vogël, për papunësinë e mundshme për shkak të luftës;

– Së katërti, 2 mld lekë ose 20 mln dollarë që vihen në dispozicion të Ministrisë së Mbrojtjes për operacionin humanitar;

– Së pesti, 1 miliard lekë ose 10 mln dollarë si fond rezervë për Këshillin e Ministrave për çdo urgjencë të paparashikuar.

– Së gjashti, do të fshijmë përgjithmonë kamatëvonesat për debitorët aktivë që kanë konsum energjie sot familjar apo biznes i vogël me efekt financiar deri në 15 mld lekë ose 150 mln dollarë. Nga kjo masë do të përfitojnë 211 e mijë e 24 abonentë;

– Së shtati, do të riskedulojmë në 6-mujorin e dytë 2020 dhe në vazhdim tatim fitimin për gjithë biznesin deri në fashën nga 2 në 14 mln lekë ose nga 20 deri në 140 mijë dollarë xhiro.

Shtyrja e dorëzimit të bilanceve për një periudhë deri në 1 qershor për bizneset që dorëzojnë bilancet në QKB online ose drejtpërdrejt, do të përfshihet nesër me gjithë të tjerat si pjesë e aktit normativ për ndryshimet në buxhetin e shtetit 2020.

Jemi vetëm, s’kemi kujt t’ja shtrijmë dorën

Kryeministri Edi Rama deklaroi se të ardhurat e shtetit duke nisur që nga ky muaj do të bien në pikatë. Në një dalje për mediat Rama theksoi se në këtë luftë, që po vuajnë të gjithë shtetet e botës për shkak të koronavirusit, jemi të vetëm. Ai theksoi se nuk mund t’ja shtrijmë dorën dikujt për ndihmë, ndërsa tha se mund të përjetojmë tragjedi me qindra të vdekur nga COVID-19.

“Ju lutem dhe ju kërkoj ndjesë 1 mijë herë, dhe mos kërkoni nga unë, të mos përsëris pa pushim; luftërat nuk vinë për të mos na dëmtuar ekonomikisht apo për të mos na e bërë detin kos. Por sjellin rrezikun e plagosjes rëndë dhe të vdekjes ekonomike. Luftrat vinë se si të kullandrisen për të siguruar jetesën në shtëpitë tona. Kjo luftë na kthen që të mbrohemi brenda mureve të shtëpisë. Kjo dot ë thotë motra e vëllezër, se sa do që të kërkoni nga unë, sado që unë t’ju plotësojë të tëra, në këtë shtëpi tonën më të varfër, në lagjen tonë, qeveria do të bëjë me patjetër gjithçka mundet,. Por çdo anëtar i familjes shqiptare duhet të ndërgjegjësohet se gjihçkaja, s’mund të përfshijë shumëçka që kemi në kohë të bekuar të paqes. Qeveria mbledh dhe administron të ardhurat, njësoj si ju në shtëpi. Në luftë të ardhurat gjithnjë bëjnë, si për popullin dhe shtetin. Në këtë luftë të hatashme, të ardhurat e shtetit, të shtëpisë së madhe, do të bien në një pikatë të hatashme.”

Më dëgjoni më vëmendje, dhe foli një herë me sinqeritet:

“Pikërisht se sa nuk e dimë se sa do të zgjas, se dimë se sa do na bien të ardhurat. Ndaj plani ynë për të shpenzuar teksa punojmë më pak se dje, do të kemi më pak të ardhura sesa të kishim po të vazhdonim normalisht. S’mund të kemi një plan për ti kënaqur të gjithë sot dhe ti lëmë me gisht në gojë nesër. Kjo kohë ska lidhje me një kohë të programimit të të ardhmes. Të radhuat në buxhetin e shtetit këtë muaj do të bien shumë. Po sikur mos të mjaftojë për muajt në vazhdim. Si do ja bëjmë ne muajt në vijim brenda shtëpive tona? Si duhet të programojmë ne furnizimin e forcave të rezistencës brenda kështjellës tonë?! Ndajeni mendjen se në këtë luftë për ekzistencë, jemi vetëm. Nuk jemi pas tërmetit, se pasi na ra tavani mbi kokë dhe varrosëm 51 jetë, morëm rrugën e botës dhe me dorë shtrirë si hallexhinj, garantuam fondet e rindërtimit. S’jemi pas tërmetit, po jemi para një furtune ku mund të na marrë qindra e mijëra jetë, të shtrira në spitale apo dhe ne palestra. Nuk kemi kujt t’i shtrijmë dorën tjetër.”

O do luftojmë bashkë ose s’do ketë njeri të na varrosë e jo më të na qajë

“Nuk e dimë kur do vijë çlirimi. Vetëm Zoti e di deri kur”. Kështu tha kreu i qeverisë sot para shqiptarëve duke iu referuar situtës së krijuar dhe masave për koronavirusin. Apeli i kryeministrit Edi Rama për shqiptarët për të mos dalë nga shtëpia është përshkallëzuar nga dita në ditë e sot thirrja e tij ka qenë edhe më e fortë. Ose do luftojmë të gjithë bashkë, tha Rama në komunikimin e mbrëmjes së sotme, ose të gjithë bashkë do vdesim dhe si në Bergamo/ Itali nuk do ketë njeri të na varrosë e jo më të na qajë.

Kryeministri tha se kjo është një luftë botërore ku secili është më vete, nuk ka aleanca. Në këtë situatë nga koronavirusi, sipas Ramës si Shqipëria si Amerika gjenden në të njëjtën anije.

“Motra dhe vëllezër, ju përqafoj të gjithëve nga një distancë e sigurt për secilin prej jush. Ju falënderoj nga zemra edhe pse fjala falënderim është shumë pak për ta shprehur mirënjohjen e thellë për ju. Për ju të gjithë që në këtë kohë lufte botërore me një armik të padukshëm dhe vrastar i cili ka pushtuar mbarë globin po manifestoni një shpirt luftarak të pashembull. Për ju të gjithë që po investoni zemrën, mendjen, trupin tuaj në këtë luftë të hatashme për familjet tuaja, të afërmit e miqtë tuaj, komunitetin tuaj dhe shtëpinë tonë, Shqipërinë. Ju kërkoj përulësisht ndjesë 1 mijë herë për gjithçka të papëlqyeshme që kam thënë dhe do të them deri në fund i detyruar t’ju them pa pushim dhe të bëj pa ngurrim deri sa kjo luftë të mbarojë. Fjalët e sheqerosura për rreziqet që na kanosen dhe ngurrimi për të bërë veprimet e duhura për zbutjen e rreziqeve sot janë një tradhti që nuk duhet ta prisni kurrë nga unë. Shikoni çfarë po ndodh në vende shumë më të mëdha, shumë më të zhvilluara se Shqipëria, në shëndetësi, shkencë, ekonomi, po e paguajnë një nga një iluzionin se kjo është një ëndërr e keqe që do të mbarojë vetë dhe do të mbarojë shpejt. Vende me aftësi për t’i dhënë mend gjithë botës, shtete me fuqinë dhe përgjegjësinë për të zotëruar fatet e mbarë njerëzimit u kapën të gjithë gafil, komplet të paditur dhe të papërgatitur nën agresionin e një virusi të panjohur.

Një armik i rënë mbi kokat e tyre si rrufeja në qiell të pastër u ka zhvlerësuar trilionat e dollarëve bomba atomike nëpër depo duke i gjetur pa shtretër të mjaftueshëm spitalorë për të plagosurit e kësaj lufte, pa aparatura të mjaftueshme të frymëmarrjes për njerëzit me plagë vdekjeprurëse në këtë luftë, pa maska e veshje të mjaftueshme mbrojtëse për armatat e tyre fantastike të bluzave të bardha e deri pa numra të duhur mjekësh të specializuar kundër asfiksimit të qenies njerëzore.

Për çudinë më të madhe të kësaj bote si Shqipëria si Amerika, si Kosova si Gjermania, si Ballkani i varfër si Europa e pasur gjenden në të njëjtën anije në det të hapur dhe kanë një armë të vetme në dispozicion, rezistencën e popujve të tyre. Një armë që ka vetëm një fishek unitetin popullor dhe ka një objektiv atë që ke më afër të cilin duhet ta mbash sa më larg. Kjo është e para luftë në historinë e njerëzimit, ku kazerma është shtëpia dhe ku çdo ushtar duhet të mbyllet në shtëpi. Është një luftë ku si ushtria amerikane si ushtria shqiptare kanë të njëjtën forcë goditëse, zero. Është një luftë ku asnjë aleancë mes shtetesh nuk ekziston dhe nuk duket në horizont. Një luftë botërore ku secili është më vete e Zoti mbetet i vetmi që është për të gjithë. Ndajeni mendjen se në këtë luftë jemi vetëm dhe kemi vetëm njeri-tjetrin. O luftojmë bashkë si një njeri i vetëm kur përballet me hijen e vdekjes o të gjithë bashkë si popull do të biem në një humnerë ku njësoj si të vdekurit e shkretë dhe të panumërt në zonën e Bergamos s’do ketë kush të na varrosë e jo më të na qajë”, tha Rama.

Ai theksoi se nuk e di kur do mbarojë kjo luftë.

“Ne, Shqipëria, qeveria, unë që më qëlloi të jem në krye të kësaj pune në këtë kohë të mallkuar, nuk jemi as më të mençur, as më të ditur, as më të fortë jo e jo se ata që humbën kohë me iluzionin që virusi do të zhdukej vetë dhe ngurruan me javë të tëra të armatosen me masat shtrënguese që kufizojnë rëndë lirinë e njerëzve për të garantuar shëndetin e tyre. Por pikërisht sepse jemi më të dobët se ata vrapuam më shpejt të mbyllemi në shtëpi. Do vazhdojmë kështu pa asnjë iluzion dhe pa asnjë ngurrim deri kur ky armik të shporret nga vendi ynë. Nuk e dimë, nuk e di askush, as ata që i dinë të gjitha se kur do të vijë dita e çlirimit nga ky makth. Të gjithë e dinë se nuk do vijnë as javës tjetër e as pas dy javësh. Kur të kalojnë dy javë do thonë na duhen dhe dy të tjera. Vetëm Zoti e di se deri kur.”

Dhe jo vetëm kaq! Edi Rama duke iu drejtuar qytetarëve tha mos më kërkoni t’ju shes iluzione, thuajse dikush e ka projektuar shpëtimin tek ai.

“Prandaj shumë të dashurit e mi ju dua shumë dhe ju ndiej si njerëzit e shtëpisë sime por mos më kërkoni t’ju shes iluzione, t’ju mbaj me llafe të bukura, apo t’ju premtoj se kjo luftë do mbarojë shpejt apo do kalojë pa vuajtje që mund të jenë dhe shumë të mëdha. Shtrëngoni dhëmbët kur shpirti ju vjen për të dalë, stërvitni veten duke luftuar pa pushim me forcën e zakoneve të jetës së përditshme dhe ndajeni mendjen që kjo luftë nuk ka ardhur për t’i dhënë askujt një leje të jashtëzakonshme që të qëndrojmë në shtëpi, të hamë dhe të pimë sikur jemi me pushime dhe të presim nga qeveria të na garantojë gjithçka kishim dhe merrnim në ditët e bekuara të jetës sonë normale. E di që nuk janë këto që doni të dëgjoni dhe ka ende nga ju që nuk e kuptojnë pse nuk duhet të dalin shëtitje.”

Kryeministri Edi Rama ndonëse bëri thirrje për bashkim, gjeti vend ta akuzoj opozitën duke u shprehur se po kërkon qiqra në hell.

“Na ka hyrë në shtëpi një armik që rrezikon të na marrë qindra e mijëra njerëz të zemrës. Në këtë hall jemi vetëm. Nuk kemi asnjë derë tjetër përpos dyerve të zemrave tona ku të trokasim, se nuk ka mbetur derë në botë që nuk është mbyllur. Në shtëpinë tonë të përbashkët është shteti dhe qeveria.

Njerëzit pyesin për problemet e tyre ekonomike. Trumpi nxorri triliona, Merkel etj hapën thesin e miliardave. Ne duhet të funksionojmë si një familje. Askush nuk e di se deri kur shkon kjo luftë. Presidenti amerikan Lindon Johnson iu drejtua popullit si një familje e madhe. Shtetet e mëdha kanë buxhete të mëdha. Ka nga ata që i kërkojnë qeverisë qiqra në hell.”