Koronavirusi ul çmimin e naftës 20 %
Kaloi dhe java e pestë me rënie të çmimit të naftës nga frika se për shkak të pasojave ekonomike nga përhapja e koronavirusit edhe jashtë Kinës, do të bie dhe kërkesa për “arin e zi”.
Në tregun londinez, javën e kaluar çmimi i barelit ka ra 6.3 për qind, në 54.47 dollar, derisa në tregun amerikan bareli ra për 2.4 për qind, në 50.32 dollar.
Rënia e çmimit vlerësohet se është si pasojë e përhapjes së koronavirusit në Kinë, prej të cilit deri më tani kanë vdekur mbi 900 persona ndërsa janë infektuar më shumë se 40.000. Jashtë Kinës janë shënuar më shumë 320 raste të infektimit me këtë virus në 27 shtete dhe rajone.
Ekonomia kineze vazhdon të jetë nën presion pasi që disa qytetet tashmë janë në karantinë, shumë prej linjave të fluturimit janë anuluar, fabrika të shumta janë mbyllur ashtu si dhe disa depo furnizimi.
Analistët parashikojnë dëme shumë më të mëdha ekonomike se sa ishin parashikuar përkundër masave të shumta ekonomike të autoriteteve kineze.
Kështu analistët e JPMorgan kanë ulur parashikimet e rritjes së ekonomisë kineze nga 6.3 në 4.9 për qind, deri sa vlerësimi i rritjes globale për tremujorin e parë është ulur për 0.3 për qind.
Kjo është dhe arsyeja që pritet të ulet dhe kërkesa për naftë.
Çmimi i naftës ulet 20 %
Grupi Euroasia vlerëson se kërkesa për naftë vetëm në Kinë, si importuesin më të madh të naftës në botë do të ulet për 3 milionë barel në ditë për tremujorin e parë në krahasim me të njëjtën periudhë të vitit të kaluar.
Për këtë arsye, Organizata e vendeve-eksportuese të naftës, OPEC, dhe aleatët e saj me në krye Rusinë janë duke shqyrtuar mundësinë e uljes së mëtejme të prodhimit të naftës për 600.000 barel në ditë në mënyrë që ta mbështesin çmimin.
Grupa OPEC+ prodhon më shumë se 40 për qind të naftës në botë ndërsa aktualisht kufizon prodhimin për gjithsejtë 1.7 milionë barel në ditë ose 2 për qind të kërkesës globale.
Por ministri rus i energjetikës, Aleksandar Novak, tha se Moskës i duhen disa ditë që ta analizoj tregun e naftës dhe gjatë javës pritet ta sqaroj qëndrimin mbi kufizimin e prodhimit të naftës. Novak vlerëson se për shkak të epidemisë së koronavirusit, kërkesa globale e naftës për vitin 2020 mund të bie prej 150.000-200.000 barel në ditë, që Agjencia e lajmeve Reuters e konsideron si vlerësim konservator.
Sidoqoftë, nga paraqitja e koronavirusit, çmimet e naftës kanë rënë për 20 për qind sepse Kina është importuesi më i madh i naftës. Më parë, vlerësohet se ka importuar 10 milionë barel në ditë.
Dhe, derisa OPEC vazhdon të ul prodhimin, SHBA vazhdon rritjen e prodhimit. Në Shtetet e Bashkuara, prodhimi i naftës është nivelet rekord, e raportimet e kompanisë Baker Hughes tregojnë se javën e kaluar numri i impianteve aktive në SHBA është rritur për tri herë në katër javët e fundit për një impiant, që gjithsejtë janë 676.
