Korpusi i Paqes, Presidentja Osmani: Lidhja Kosovë-SHBA kalon lidhjet diplomatike!

Lidhja SHBA-Kosovë i kalon lidhjet diplomatike, ajo është rrënjosur në vlera të përbashkëta të lirisë, demokracisë, dhe përpjekjes sonë për të ardhmen më të mirë, tha sot Presidentja e Kosovës, Vjosa Osmani në ceremoninë e betimit të 17 vullnetarëve të Korpusit të Paqes që do të shërbejnë për dy vite në Kosovë.

Ambasadori amerikan, Jeffrey Hovenier, ka çmuar kontributin e stafit të Korpusit të Paqes, duke i cilësuar si bartës të vlerave. Ndërkaq për vullnetarët tha se angazhimi i tyre e shtrin paqen në botë.

“Para se ta betoj këtë grup të vullnetarëve, dua të përkujtoj se janë 17 komunitete në mbarë Kosovën. Ky bashkëpunim që kemi është bërë vetëm falë drejtorëve të shkollave, zyrtarëve komunal të cilët kanë kërkuar. Faleminderit që keni kërkuar, që keni qenë të gatshëm për të dhënë,” tha Hovenier.

Presidentja Vjosa Osmani, tha se shembulli më i mirë i relacioneve të dy shteteve janë këta vullnetarë.

“Është mirë të reflektojmë në ngushtësinë dhe thellësinë e partneritetit mes Kosovës e SHBA-ve. Lidhja jonë i kalon lidhjet diplomatike, ajo është rrënjosur në vlera të përbashkëta të lirisë, demokracisë, shërbimit dhe përpjekjes sonë për të ardhmen më të mirë,” tha Presidentja e Kosovës duke shtuar.

“Ndikimi i shërbimit tuaj nuk do të dallohet vetëm në projektet që i kryeni, apo në shkathtësitë që ia mësoni fëmijëve, por në buzëqeshjet e fëmijëve dhe në falenderimet e komuniteteve. Këto janë gjurmët e vërteta të suksesit tuaj, të cilat do ju mbesin si trashëgimi.”

Ndërkohë Ministrja e Arsimit, Arbërie Nagavci, duke mirëpritur shërbimin e radhës të vullnetarëve shtoi:

“Deri më sot Kosova ka mirëpritur mbi 220 vullnetarë të Korpusit të Paqes, për të cilat shkollat dhe familjet kanë hapur dyert e kanë jetuar së bashku.”

Lidhur me situatën e krijuar në Serbi pas zgjedhjeve të Dhjetorit, Presidentja e Kosovës, Vjosa Osmani, ka deklaruar se vendi është i gatshëm për çdo skenar të Serbisë.

“Unë jam në kontakt të përditshëm me institucionet e sigurisë dhe me partnerët ndërkombëtarë në mënyrë që t’i ndërmarrim te gjitha masat e nevojshme që ta mbrojmë Kosovën, që ta mbrojmë integritetin tonë territorial dhe sovranitetin. Serbia nuk është që mendon mirë, nuk është që planifikon mirë. Me rëndësi është që ne jemi të gatshëm për çdo skenar.”